Bibliotecamiña

Despois dunha colorida campaña publicitaria ao longo desta semana, desde o venres 13 está aberta a biblioteca, cos servizos habituais de préstamo e consulta, e o remodelado punto de lectura informal da planta baixa, onde poderedes atopar a prensa do día, revistas, banda deseñada, etc.
A partir da próxima semana botaremos a andar as primeiras actividades da biblioteca neste curso: visitas informativas para os grupos de 1ºESO, 1º BACH e Garantía Social e xogos de busca para celebrar o Día Internacional das Bibliotecas Escolares. E coa biblioteca abrimos tamén este noso blog, espazo aberto para compartir libros e lecturas. Benvidos.

Próxima apertura

Xa estamos de volta e, en breve, retomaremos a actividade deste blog que nacía no pasado curso 2005/06 desde a biblioteca do IES Auga da Laxe, dentro do proxecto de actividades Saber abre camiños e eses camiños pasan pola biblioteca. Neste curso 2006/07 a nosa biblioteca vai seguir integrada no Plan de Mellora de Biblioteca Escolares da Consellería de Educación cunha dotación económica de 9.050 euros que nos vai permitir levar adiante un novo proxecto de actividades que ha supoñer importantes novidades e melloras. Agora mesmo estamos a traballar na posta en marcha dese proxecto, polo que a biblioteca vai permanecer pechada até mediados de outubro.

E marchamos con poesía...

E despedímonos até o próximo curso con poesía, cos dous poemas que pecharon en xuño o recanto da poesía do noso punto de lectura. Dous poetas para desexarvos un bo verán!


DÍAS DE TREINTA GRADOS

Es verano por fin. Por la mañana,
los jardines en flor, recién regados,
cantan su exuberante vida y sana
en mil aromas vagos.

Es verano por fin. A mediodía,
el sol hace empaparse nuestras sienes
de sudor animal, y una alegría
salvaje nos enciende.

Es verano por fin. Al caer la tarde,
un brillo anaranjado el aire tiene.
Arde una rosa, y la mejilla arde
de un bello adolescente.

Es verano por fin. Y por la noche,
una brisa estelar refresca el mundo,
y no hay lugar para ningún reproche.
Es verano por fin. ¡Que dure mucho!

Carmen Jodra Davó, Las moras agraces, 1999


Sempre se agarda o verán,
deséxase
ese tempo para a noite como a herba
sen alerxia. Os amigos recuperados.
Próbase toda froita de óso,
búscanse os elepés de música xamaicana,
vaise esquecendo unha miga a choiva
e esta patria.
Sempre se agarda o verán porque detén a vida.
Veñen días lentos,
ríos,
ollos,
esváese o mundo afora,
vístense de xente as terrazas
no agre do lusco-fusco.
Saen tantas guerras da memoria.
Pero sempre se agarda un verán
que nunca chega.
E retíranse os dentes, vencidos,
da hora deserta.

Daniel Salgado, Sucede, 2004

MARCHAMOS DE VACACIÓNS!

Comezaron xa as vacacións do verán, unha boa ocasión para recomedarvos algunhas lecturas que vos acompañen neste caloroso tempo de lecer. Podedes meterlle o dente a algún dos últimos títulos da colección "Fóra de Xogo", Rúa Carbón de Marilar Aleixandre ou O inferno de Marta de Pasqual Alapont, por exemplo, ou ás novelas Cielo abajo de Fernando Marías, gañadora do premio Anaya 2005, e El señor de los ladrones de Cornelia Funke. E se vos apetece achegarvos a unha cultura de moda entre nós, propoñémosvos os relatos de Sueño profundo, da xaponesa Banana Yoshimoto.

Ademais, coa resaca do mundial de fútbol de Alemaña, recén rematado, facémosvos tamén algunhas propostas futboleiras: Déixao medrar de Silvestre Gómez Xurxo, Lume de viqueira de X. Vázquez Pintor, O gol imposible de Enrique Sanchez ou Un pueblo contra los Hamid de Oriol Vergés.

E se queredes fedellar na rede para buscar lecturas á carta, aquí van algúns sitios web que poden axudarvos: www.filix.org, www.culturagalega.org/lg3, www.sol-e.com e www.fundacióngsr.es

Desexámosvos un feliz verán de libros!!!!!!

Praza das Letras

Acaba de entrar na nosa biblioteca a versión en papel da revista Praza das Letras, un proxecto que nos chega desde a Consellería de Cultura e que, segundo anuncian, vai incluír, ademais da revista, unha gran web na que teñan cabida todas as iniciativas que se produzan arredor do mundo do libro.

Xa está aí o Mundial de Fútbol de Alemaña e unha das primeiras propostas que nos fai Praza das Letras é un certame literario que vai ter como protagonista o fútbol. Se tes menos de 18 anos, podes escribir un relato breve (máximo de 10.000 carácteres) que toque dalgunha maneira o tema do fútbol e envialo antes do 31 de xullo ao enderezo electrónico info@prazadasletras.org

O xurado valorará a orixinalidade e a calidade creativa e narrativa dos relatos. O gañador ou gañadora recibirá un balón de fútbol e un lote de libros. Ademais, o seu relato será publicado no próximo número da revista Praza das Letras. Anímate a participar!

A revista inclúe tamén un especial sobre o fútbol na literatura galega, con recomendacións de libros que tratan este tema. Bótalle unha ollada: tes un exemplar na biblioteca e outro no punto de lectura.

O poema da semana

Nesta Semana das Letras Galegas, o "Recanto da poesía" que temos no punto de lectura do instituto acolle un poema do libro Os soños na gaiola (1968), de Manuel María.

GALICIA

Galicia docemente
está ollando o mar:
ten vales e montañas
e terras pra labrar!

Ten portos, mariñeiros,
cidades e labregos
cargados de traballos,
cargados de trafegos!

Galicia é unha nai
velliña, soñadora:
na voz da gaita rise,
na voz da gaita chora!

Galicia é o que vemos:
a terra, o mar, o vento...
Pero hai outra Galicia
que vai no sentimento!

Galicia somos nós:
a xente e mais a fala.
Se buscas a Galicia
en ti tes que atopala!

CLUB DE LECTURA: Erros e tánatos, de Gonzalo Navaza

Imos aproveitar este novo espazo para convidarvos a participar na segunda sesión do noso club de lectura o 24 de maio, ás 20,00h na biblioteca do instituto. Igual que fixemos xa a finais de marzo con Noite de voraces sombras, de Agustín Fernández Paz, ímonos xuntar de novo para falar de Erros e tánatos, un volume de relatos de Gonzalo Navaza publicado no ano 1996. Tamén desta vez imos ter a oportunidade de contar coa presenza do autor. Anímate a celebrar esta Semana das Letras Galegas lendo Erros e tánatos e achégate o día 24 á nosa biblioteca para compartirmos conversa. Se xa o liches, convidámoste a que vaias deixando aquí os teus comentarios sobre o libro.

Nace Bibliolaxe

Desde a biblioteca do instituto queremos celebrar a Semana das Letras Galegas poñendo ao voso dispor un novo espazo para compartirmos as nosas lecturas: o blog Bibliolaxe. Queremos que sexa un lugar de encontro para dar conta das novidades que entran na biblioteca, para recomendar libros, para comentar, para opinar, suxerir, preguntar ou informar sobre todo o que teña que ver co mundo do libro e a lectura.