bibliolaxe

Homenaxe a Agustín Fernández Paz

2011-07-28T00:17:00.003+02:00

Desde a Biblioteca Agustín Fernández Paz, do IES Auga da Laxe, deixámosvos aquí este vídeo co que lle queremos facer unha pequena homenaxe á obra do escritor que lle dá nome á nosa biblioteca. En febreiro de 2010 convocamos no instituto o concurso Memoria de elefante. Durante máis de un mes os títulos das obras de Agustín estiveron colgados do patio interior nuns carteis realizados polo alumnado de 1º, 3º e 4º de ESO, grazas á colaboración do profesorado do departamento de Ed. Plástica, e propuxémoslle ao alumnado un reto: que os memorizase por orde de publicación e os recitase logo nun acto final. As gañadoras daquel xogo foron María Pena, Marta Fernández e Sandra Salgueiro, que demostraron unha capacidade memorística impresionante ao recitar cos ollos pechados os 44 títulos que naquel momento formaban a obra literaria de Agustín Fernández Paz. Daquel xogo naceu este vídeo que esperamos que vos guste.

A insoportable levedade das bibliotecas escolares galegas

2011-06-02T00:12:00.002+02:00

Ante a previsible retirada de formadores específicos no ámbito das bibliotecas escolares no Servizo de Formación do Profesorado, no Centro Autonómico de Formación e Innovación e nos centros de formación e recursos dependentes da Dirección Xeral de Educación, Formación Profesional e Innovación Educativa, segundo o borrador da orde que convocará concurso público de méritos para cubrir postos de persoas directoras e asesoras nestes centros queremos manifestar o seguinte:

Hai proxectos que nacen marcados pola vulnerabilidade e a razón desta circunstancia non ten nada que ver coa falta de rigor ou a pouca entrega das persoas que os poñen en marcha. Máis ben ten que ver co feito de que nacen destinados a nadar contra corrente. Con todo, esa é a principal razón da súa existencia: xorden porque responden a unha necesidade non satisfeita pero compartida por un número crecente de persoas que senten que é posible compartir e facer viable o proxecto xuntos. Así naceu o movemento que cristalizou na iniciativa que todos coñecemos como PLAMBE. De xeito que dende hai algúns anos, esa iniciativa levou o mellor da creatividade e o esforzo de moitos docentes que xenerosamente regalaron o seu tempo e a súa capacidade de formar equipos e ilusionar a outros docentes en centros e centros de toda a nosa comunidade. Xuntos aprendemos a ser rigorosos e esixentes nos nosos proxectos, a crear espazos de aprendizaxe colaborativo, de cambios de estratexia, de achegamento ás novas tecnoloxías, de racionalización na xestión da información. Que ninguén se equivoque: os responsables das bibliotecas escolares non son seres evanescentes perdidos en vanas quimeras que tentan “roubar” horas a materias “importantes” para que o alumnado esmoreza entre mundos de ficción. Nada máis lonxe da realidade. Nun centro onde hai un equipo que xestiona a biblioteca de forma eficaz nótase. Os fondos adquírense con criterio, establécense acordos para xestionar a información, créanse espazos de colaboración e docencia compartida. Non é doado porque a maquinaria educativa ten unhas inercias difíciles de combater. A pesar de todo, estes docentes fórmanse e exercen a súa dura misión en horas non retribuídas, roubadas ás súas familias, ao descanso, ao lecer. Fomos coordinados con rigor e seriedade pola Asesoría de Bibliotecas Escolares pero sempre nos faltou o marco legal axeitado. A nosa misión é dura porque queda moito por definir. Na nosa inxenuidade e boa fe esperabamos conseguir progresivamente tempos e formación para seguir mellorando na nosa función se demostrabamos que eramos rigorosos e eficaces. Os nosos méritos como colectivo son dabondo coñecidos polos nosos gobernantes e acreditados por diferentes administracións e ámbitos a nivel estatal. Os numerosos e constantes premios anuais de boas prácticas concedidos polo Ministerio de Educación y Ciencia non caeron do ceo. Durante todos estes anos a formación recibida foi fundamental para levar a cabo actuacións rigorosas e enfocadas na dirección correcta.

Sabemos das cuantiosas axudas que a Dirección Xeral de Educación, Formación Profesional e Innovación Educativa, destina a outros proxectos, dos incentivos para a elaboración de contidos dixitais por parte das empresas editoriais, entre outras iniciativas. Non sería tamén interesante fomentar a produción de materiais propios e promover desde cada centro a estandarización de procedementos que axuden a xestionar a información entre o noso alumnado sen confiar todo a eses materiais externos que proceden da industria editorial, por valiosos que poidan ser? Por que non seguir aproveitando a experiencia e valía dos equipos das bibliotecas escolares nestes cometidos?. O noso empeño sempre foi crear nos centros pequenos focos que tentan estender esas boas prácticas de innovación e excelencia. Non entendemos este novo e repentino xiro na política de formación desta Dirección Xeral. Non nos parece xusto posto que, podemos dicir honestamente que, pola nosa banda, cumprimos con fartura. Ao desmantelar as estruturas que nos sosteñen o deterioro será proporcional ao entusiasmo e o esforzo investidos: inmenso e imparable. Algúns lembramos como o noso Conselleiro lanzou un bico ao aire ao despedirse dos asistentes aos últimos encontros despois dunhas entusiastas palabras de eloxio polos éxitos logrados polas bibliotecas escolares galegas a nivel estatal. Onde quedou ese entusiamo? Que interpretación debemos facer? O noso país pode permitirse tirar pola borda todo este traballo? E nós? En que situación quedaremos agora diante das nosas comunidades educativas se despois de tanta insistencia é a propria Consellería a que nos invisibiliza?

Colectivo dos equipos das bibliotecas escolares integradas no PLAMBE (Plan de Mellora das Bibliotecas Escolares Galegas)

Apadriñamento lector no CEIP Chano Piñeiro

2011-05-26T18:22:00.003+02:00

Este pasado martes 24 de maio corenta alumnos e alumnas de 4ºESO do noso instituto participaron nun apadriñamento lector co alumnado de 3º de Educación Infantil e de 1º de Primaria do CEIP Chano Piñeiro, organizado polo departamento de Lingua Galega coa colaboración da biblioteca. Recibíronnos na recén estreada biblioteca do CEIP Chano Piñeiro e alí presentáronse as madriñas e padriños e os seus afillados e afilladas para logo marcharen por parellas a ler xuntos un par de contos e conversar arredor desas lecturas.

Moitas grazas ao profesorado do CEIP Chano Piñeiro por acoller esta iniciativa e ao seu alumnado de Infantil e 1º de Primaria polo cariño con que nos recibiron e escoitaron e polos fermosísimos marcadores de lectura personalizados cos que agasallaron os seus padriños e madriñas lectores. Sen dúbida, unha actividade atractiva e enriquecedora que nos gustaría repetir.

Club de lectura con Palabras de Caramelo

2011-03-31T17:20:00.010+02:00

O próximo luns, 4 de abril, teremos unha nova sesión do club de lectura Auga da Laxe. Nesta ocasión o libro proposto é Palabras de Caramelo, de Gonzalo Moure, unha novela que nos presenta a relación de amizade entre Kori, un neno saharauí xordomudo de oito anos, e un camelo. Unha historia de silencios e palabras, de conversas coas mans e co corazón, de amizade e de dor. Unha historia que nos levará ata Smara e que nos permitirá achegarnos á vida cotiá dos campamentos de refuxiados de Tinduf, onde vive o pobo saharauí, ese pobo que Gonzalo Moure visita con frecuencia nunha relación tamén de amizade, que o levou a participar en proxectos tan fermosos como o Bubisher. Alí, en Smara, é onde Kori vai á escola e devece por aprender a escribir.

Deixámosvos aquí algunhas imaxes da sesión do trimestre pasado, cando nos xuntamos para falar de A mansión dos Pampín, de Miguelanxo Prado.

Poesía fresca

2011-03-22T10:37:00.007+01:00

Este ano celebramos o Día da Poesía convidando a ler poesía fresca. Nunha cesta que estaba no punto de lectura ofrecemos máis de 400 poemas para que o alumnado e o profesorado collesen un coma quen proba unha peza de froita fresca. Aproveitamos, ademais, para lembrar que na nosa biblioteca os libros de poesía poden localizarse facilmente porque levan un punto vermello no lombo.

A mansión dos Pampín, no club de lectura

2010-12-09T17:38:00.010+01:00

A mansión dos Pampín, de Miguelanxo Prado, será a lectura proposta para a próxima sesión do club de lectura Auga da Laxe, que terá lugar o luns, 20 de decembro, de 15:00h a 17:00h. Nesta ocasión achegarémonos a un álbum de banda deseñada no que se fala de caos urbanístico e de feísmo arquitectónico en clave de humor, unha interesante proposta que formou parte do Proxectoterra, promovido polo Colexio Oficial de Arquitectos de Galicia.

Na biblioteca tedes exemplares ao voso dispor. Tamén se pode ler aquí e mesmo pode verse en Vimeo unha versión dramatizada, realizada desde o IES Ferrolterra.

Homenaxe a Mario Vargas Llosa

2010-12-08T22:05:00.007+01:00

Mañá, 10 de decembro, Mario Vargas Llosa recibirá en Estocolmo o premio Nobel de literatura. Con el xa son once os escritores de fala hispana que acadan este galardón.
No Punto de Lectura que a biblioteca ten na planta baixa do instituto temos esta semana unha pequena selección de fragmentos das novelas máis significativas do escritor peruano e, ao seu lado, breves biografías acompañadas de textos dos dez autores, españois e latinoamericanos, que o antecederon.

Deixámosvos tamén un fragmento do discurso de Vargas Llosa:

“Seríamos peores de lo que somos sin los buenos libros que leímos, más conformistas, menos inquietos e insumisos y el espíritu crítico, motor del progreso, ni siquiera existiría. Igual que escribir, leer es protestar contra las insuficiencias de la vida. Quien busca en la ficción lo que no tiene, dice, sin necesidad de decirlo, ni siquiera saberlo, que la vida tal como es no nos basta para colmar nuestra sed de absoluto, fundamento de la condición humana, y que debería ser mejor. Inventamos las ficciones para poder vivir de alguna manera las muchas vidas que quisiéramos tener cuando apenas disponemos de una sola”.

Nós tamén navegar...

2010-10-28T17:46:00.005+02:00

Baixo a sombra dos recortes de profesorado e da redución de horas, o proxecto de actividades da nosa biblioteca comezou a navegar neste inicio de curso. Chegaron as novidades máis fresquiñas aos nosos andeis, comezou a hora de ler, abriu de novo o recanto da poesía e celebramos esta semana o Día das Bibliotecas coas visitas á biblioteca do alumnado de 1ºESO. Tivemos tamén unha xuntanza inicial de presentación do club de lectura, que celebrará a súa primeira sesión presencial o luns 20 de decembro.

Deixámosvos aquí o cartel de Marina Seoane co que Asesoría de Bibliotecas Escolares nos agasalla neste comezo de curso para lembrar que a biblioteca escolar ofrece un mundo de posibilidades. Tamén desde a asesoría presentan, como é habitual nestas datas, os III Encontros de Bibliotecas Escolares de Galicia, onde estaremos os días 29 e 30 de outubro.

O barco comeza a andar amodiño, á espera de ventos máis favorables. Que teñamos unha boa travesía!

Excursión bibliotecaria a Porto

2010-07-09T19:38:00.004+02:00

O 21 de xuño de 2010 realizamos co alumnado que participou no club de lectura e nas outras actividades de dinamización da biblioteca unha excursión á cidade do Porto co seguinte programa de actividades: visita guiada á Biblioteca Almeida Garrett, obradoiro Poesía e astronomía coa escritora e profesora Regina Gouveia e visita á Biblioteca Pública Municipal do Porto. Ademais, mentres o alumnado e unha parte do profesorado realizaba unha visita á cidade, a profesora coordinadora do proxecto da biblioteca mantivo un encontro con máis de 30 profesores e profesoras de diferentes centros de ensino da cidade de Porto e da comarca para presentar o proxecto de traballo da nosa biblioteca escolar.

Moitas grazas a Regina Gouveia polo obradoiro e moitas grazas ás responsables da biblioteca Almeida Garrett e da Biblioteca Municipal do Porto por recibirnos e presentarnos os espazos e os proxectos destas dúas bibliotecas. Un agradecemento moi especial á profesora Dna. Maria Joao pola súa axuda e entusiasmo na organización desta xornada. Foi un peche moi especial para as actividades da biblioteca neste curso que acaba de rematar, unha visita que nos permitiu achegarnos a outras realidades bibliotecarias e coñecer un pouco mellor o que se fai no ámbito da lectura e das bibliotecas en Portugal.

Boas vacacións e até setembro!

Despedida do club de lectura

2010-06-07T12:55:00.004+02:00

O pasado 31 de maio tivemos a última sesión do club de lectura deste curso arredor de cinco relatos do libro 21 relatos contra el acoso escolar. Primeiro xantamos xuntos na cafetería do instituto, cunha sobremesa especial: uns biscoitos aos que nos convidou a nosa compañeira Marta. Xa na biblioteca, logo dunha introdución de Bea sobre os autores dos relatos lidos, vimos a curtamentraxe El encargado, de Nacho Vigalondo e Sergio Barrejón, e comentamos os relatos, que nos levaron tamén a falar de situacións de acoso dentro das aulas, de casos concretos de discriminación a compañeiros e da actitude que temos diante destas situacións.

Última sesión do club de lectura

2010-05-26T11:27:00.005+02:00

O próximo luns 31 de maio, de 15:00h a 17:00h, teremos a última sesión do club de lectura Auga da Laxe. Nesta ocasión, dándolle continuidade ao proxecto Derrubando valados que iniciaramos no 2º trimestre, centrarémonos na existencia de valados invisibles dentro do propio instituto a través dun achegamento ao acoso entre iguais. Propuxemos a lectura de cinco relatos do libro 21 relatos contra el acoso escolar, de varios autores. Tedes máis informacón no blog do club de lectura. Con esta sesión rematan as actividades de dinamización da biblioteca para este curso. Queda unicamente a excursión final que teremos co alumnado que máis participou nas actividades e que sumou máis bibliopuntos ao longo do curso. Será o 21 de xuño.

Das pegadas a Novoneyra

2010-05-10T12:58:00.006+02:00

As paredes de subida e baixada das escaleiras acolleron durante estas dúas últimas semanas as recomendacións que o profesorado e o alumnado nos fixeron chegar con motivo do Día do Libro. Puidemos así compartir cos demais eses libros que deixan pegada. Retirámolos para deixarlles paso ás pegadas poéticas de Uxío Novoneyra, o autor ao que este ano se lle dedica o Día das Letras Galegas. Como el foi do Courel a Compostela, imos nós das pegadas a Novoneyra.

Libros que deixan pegada

2010-04-21T11:49:00.007+02:00

Desde a biblioteca lanzamos esta semana unha proposta coa que pretendemos celebrar o Día do Libro intercambiando recomendacións de lectura. Preparamos unhas pegadas xigantes para recomendar libros que queiramos compartir cos demais, eses libros que nos gustaron moito, que deixaron pegada en nós. Tanto na biblioteca como no punto de lectura podedes recoller esas pegadas para escribir nelas as vosas recomendacións.

Tres memorias de elefante

2010-04-09T13:09:00.005+02:00

María Pena (3ºESO-B), Marta Fernández (4ºESO-B) e Sandra Salgueiro (4ºESO-B) foron as gañadoras do xogo Memoria de elefante co que a biblioteca pechou o 2º trimestre. Estas tres alumnas foron quen de recitar de memoria e por orde os 45 títulos das obras de Agustín Fernández Paz que durante máis de un mes estiveron colgados no patio do instituto. Desde a biblioteca, os nosos parabéns!

Día da Poesía: visita de Carlos Negro

2010-03-22T11:38:00.007+01:00

Para celebrar o Día Mundial da Poesía, a semana pasada recibimos a visita do poeta Carlos Negro, quen mantivo un encontro co alumnado de 4ºESO. Logo de leren Makinaria e unha selección das outras obras de Carlos Negro, puideron escoitar os poemas do libro recitados polo propio autor e compartir con el outras actividades: falaron de poesía, escoitaron a historia de Frederick -o rato poeta de Leo Lionni-, recitaron breves poemas de amor, rezaron xuntos unha oración de Far-west, rapearon un poema de Makinaria e, finalmente, descubriron o enigma de todos aqueles cochiños de xoguete que Carlos Negro fora colocando enriba da mesa ao longo da sesión... Representaban os 85 mozos menores de 30 anos que morreron o ano pasado en Galicia como consecuencia dun accidente de automóbil. Foron en definitiva, 90 minutos de poesía, música, voz e reflexión nos que Carlos Negro enganchou e sorprendeu. Grazas, Carlos! E grazas tamén a Noelia e Sheila pola presentación e a Álex polo rap de Sound Sessión vol.2.

Homenaxe a Agustín Fernández Paz

2010-03-15T22:54:00.006+01:00

Este pasado 13 de marzo asistimos en Pontevedra ao acto que o Salón do Libro Infantil e Xuvenil de Pontevedra organizou para render homenaxe a Agustín Fernández Paz. O encargado de facer a loanza de Agustín foi o tamén escritor Xavier P. DoCampo, quen, a través dun emotivo discurso escrito en forma de abecedario, foi facendo unha relación moi persoal daquelas palabras que mellor definen a Agustín e a súa obra. Foron palabras e reflexións fermosas, escritas desde a amizade que os une e as moitas experiencias que levan compartido ao longo dos anos.

Tamén na intervención de Agustín houbo espazo para o agradecemento e para a amizade, para as súas lecturas e para os seus lectores e lectoras, para todos os que traballan a prol do libro e a lectura, para as súas obras e para todos aqueles aos que, como lector, tanto lles debe.

Logo dunha intervención da Concelleira de Cultura de Pontevedra, Lola Dopico, pechouse o acto cunha actuación musical da que foron protagonistas Mini e Mero, cunha selección de temas entre os que se puido escoitar o histórico "Irmaus", baseado nun poema de Celso Emilio Ferreiro que aparece citado ao comezo de Valados, o último libro de Agustín Fernández Paz.

Pechaba así esta fin de semana as súas portas a 11ª edición do Salón do Libro Infantil e Xuvenil de Pontevedra, que acolleu tamén unha exposición sobre a figura e a obra do escritor homenaxeado. Desde a biblioteca do IES Auga da Laxe enviámoslle os nosos parabéns a Agustín por esta fermosa e merecida homenaxe.

Sesión do club de lectura

2010-03-04T22:45:00.005+01:00

Este pasado luns 1 de marzo celebramos a sesión trimestral do club de lectura do instituto. O libro escollido nesta ocasión foi Valados, de Agustín Fernández Paz. No blog do club de lectura tedes máis fotos e información sobre esta sesión.

MEMORIA DE ELEFANTE

2010-02-26T15:53:00.006+01:00

A biblioteca acaba de convocar o xogo do 2º trimestre: Memoria de elefante. Coa colaboración do profesorado de Plástica, Dorinda e Paco, e do alumnado de 1º, 3º e 4ºESO, puxemos dando dúas voltas ao patio interior do instituto uns rótulos cos títulos de todas as obras de Agustín Fernández Paz. O xogo proponlle ao alumnado que queira participar que memoricen todos os títulos: gañará o que consiga dicir por orde e cos ollos tapados o maior número posible de títulos, todos se é posible. Teñen até o 23 de marzo para memorizalos e anotarse. Os días 24 e 25 faremos o concurso nos recreos.

Próxima sesión do club de lectura

2010-02-08T12:36:00.011+01:00

O próximo 1 de marzo, luns, teremos a sesión trimestral do club de lectura que organiza a biblioteca. O libro proposto nesta ocasión será Valados, de Agustín Fernández Paz, un libro que fala dos valados visibles e invisibles que separan e enfrontan as persoas por diferentes razóns e da necesidade derrubalos. Como fixemos no trimestre anterior, a sesión comezará ás 15:00h e rematará ás 17:00h. Primeiro xantaremos todos xuntos na cafetería do instituto e logo iremos á biblioteca para conversar sobre a lectura e ver un pequeno documental sobre valados no mundo.

Esta proposta de club de lectura arredor de Valados serve tamén como punto de partida para un proxecto de investigación interdisciplinar que a biblioteca lles acaba de propoñer a todos os departamentos didácticos. Baixo o lema xeral Derrubando valados, propuxémoslle a todo o profesorado que queira sumarse que desenvolva até final de curso algunha actividade relacionada tanto cos valados visibles como cos invisibles. No Departamento de Xeografía e Historia están xa comezando a traballar este tema en 3ºESO e agardamos que nas próximas semanas se vaian sumando outros departamentos.

Aquí podedes ver algunhas imaxes da sesión do trimestre pasado, centrada no libro Barro de Medellín, de Alfredo Gómez Cerdá. Nos próximos días, iremos deixando máis información no blog do club de lectura.

Rematou o xogo

2009-12-21T12:42:00.002+01:00

Hoxe rematou o xogo das 6 preguntas: Que? Quen? Cando? Onde? Como? Canto? Logo de corrixir a quenda sobre Agustín Fernández Paz que os grupos tiñan que entregar hoxe, as puntuacións quedaron do seguinte xeito:

- Equipo Os de Mañufe: 17 puntos (6+4+0+3+4)
- Equipo Ghalisia d'Sar: 24 puntos (5+4+6+4+5)
- Equipo Made in China: 27 puntos (6+4+6+6+5)
- Equipo Los Yogures: 14 puntos (1+5+5+3+0)

O equipo gañador do xogo é, polo tanto, Made in China, formado por Lucía Aguiar (3ºESO-B), María Pena (3ºESO-B), Elena Crespo (3ºESO-B) e Enrique Crespo (3ºESO-A). Parabéns ao grupo gañador, grazas a todos por participar e boas vacacións!!!

QUE? QUEN? CANDO? COMO? CANTO? ONDE? - 5

2009-12-18T13:29:00.006+01:00

Hoxe entregámoslles aos grupos que están a participar no xogo a última quenda de preguntas.

Tema: Agustín Fernández Paz.

QUE número de teléfono figura no anuncio que aparece ao comezo do sexto conto do libro Contos por palabras?

QUEN é o tradutor ao catalán da novela Noite de voraces sombras?

CANDO gañou Agustín Fernández Paz o Premio Nacional de Literatura Infantil e Xuvenil?

ONDE vive a nena protagonista da novela As flores radioactivas?

CANTOS anos cumpre Branca?

COMO se titula en éuscaro a novela Cos pés no aire?

Logo de corrixir as respostas á quenda de preguntas de matemáticas de onte, a puntuación queda do seguinte xeito:

- Equipo Os de Mañufe: 13 puntos (6+4+0+3)
- Equipo Ghalisia d'Sar: 19 puntos (5+4+6+4)
- Equipo Made in China: 22 puntos (6+4+6+6)
- Equipo Los Yogures: 14 puntos (1+5+5+3)

O próximo luns, logo de sumar os puntos correspondentes á quenda de preguntas entregada hoxe, saberemos quen é o equipo gañador.

QUE? QUEN? CANDO? ONDE? CANTO? COMO? - 4

2009-12-17T14:46:00.004+01:00

Logo da paréntese que onte provocou no xogo a suspensión das clases, hoxe continuamos preguntando...

Tema: Matemáticas.

QUE frase podía lerse no frontispicio da Academia de Platón?

ONDE se escondía o chamado palimpsesto de Arquímedes?

COMO quería ser premiado o brahmán que obsequiou a un rei da India co xogo do xadrez, descoñecido ata o momento?

QUEN escribiu o seguinte texto?

A Filosofía está nese gran libro do Universo, que está acotío aberto ante nós (...) Está escrito na linguaxe das Matemáticas e os seus caracteres son triángulos, círculos e outras figuras xeométricas, sen as cales sería imposible entender unha soa palabra.

Podes atopar a resposta nun libro da biblioteca. Está na introdución dun dos capítulos dunha historia das Matemáticas. Ademais o número do capítulo coincide co número de caras dun dos poliedros regulares.

CANDO naceu o autor dun gravado onde se ve unha man debuxando outra man a cal está debuxando a primeira man?

CANTAS mulleres recibiron o premio que leva o nome dun dos principais artífices dos traballos do Bletchley Park para descifrar os códigos secretos nazis da máquina Enigma durante a Segunda Guerra Mundial?

As puntuacións actualizadas:

- Equipo Os de Mañufe: 10 puntos (6+4+0)
- Equipo Ghalisia d'Sar: 15 puntos (5+4+6)
- Equipo Made in China: 16 puntos (6+4+6)
- Equipo Los Yogures: 11 puntos (1+5+5)

QUE? QUEN? CANDO? COMO? CANTO? ONDE? - 3

2009-12-15T09:42:00.006+01:00

Continúa o xogo de busca da biblioteca cunha nova quenda de preguntas que hoxe recibiron os grupos participantes:

Tema: Cultura Clásica

QUE cambio tes que facer nas letras para que unhas guerras "túnicas" se transformen nunhas guerras entre os romanos e os fundadores de Cartagena?

QUEN se enfrontou ós gregos nunhas guerras do século V a.C. que ben poderían ter sido de persoal sanitario?

CANDO ocorrerá algo que se di que vai pasar ad kalendas/calendas graecas?

COMO se chama a obra máis famosa dese escultor grego que se divertía mirando?

CANTO terías que percorrer en metros para completar a proba atlética que leva o nome dunha famosa batalla das guerras da pregunta quen?

ONDE podes atopar un porteiro con tres cabezas (e lembra que non todo é fútbol)?

Nesta ocasión, dado que a Consellería de Educación suspendeu as clases de mañá, os grupos terán un chisco máis de tempo para buscar as respostas, que deberán entregarse na biblioteca no recreo do xoves 17. Como consecuencia deste cambio, e para manter a totalidade das fichas previstas, as últimas preguntas entregaranse o venres 18 e o xogo rematará o luns 21.

QUE? QUEN? CANDO? COMO? CANTO? ONDE? - 2

2009-12-14T10:47:00.004+01:00

Continuamos co xogo de busca deste trimestre. Logo de revisarmos as respostas entregadas hoxe, as puntuacións dos catro equipos participantes é a seguinte:

- Equipo Os de Mañufe: 6 puntos.
- Equipo Ghalisia d'Sar: 5 puntos (este equipo ten un punto pendente de adxudicar á espera de confirmar un dato ofrecido nunha das respostas).
- Equipo Made in China: 6 puntos.
- Equipo Los Yogures: 1 punto.

Aquí vos deixamos as preguntas de hoxe:

Tema: Bioloxía e Xeoloxía.

QUE crustáceo utiliza o ano para poder beber?

QUEN foi o primeiro ser humano que viu saír o sol dúas veces en dúas horas?

CANDO chegou C. Darwin por primeira vez ás Illas Galápagos?

ONDE van desovar as anguías dos países do Atlántico?

CANTO aumentou a distancia entre Gondomar e Nova York desde que Colón descubriu América?

COMO se chama a teoría que dicía que a vida da terra era de orixe extraterrestre?

As respostas deberán estar na caixa da biblioteca no recreo de mañá martes.

Que? Quen? Cando? Como? Onde? Canto?

2009-12-10T19:05:00.011+01:00

Hoxe comeza o xogo de busca da biblioteca deste trimestre. Desde hai un par de semanas nas paredes do instituto agromaban seis preguntas: QUE? QUEN? CANDO? ONDE? CANTO? COMO? Agora, durante unha semana, os grupos participantes terán que responder cada día unha ficha con seis preguntas de diferentes temas. Hoxe faise pública a primeira quenda de preguntas, relacionadas coa materia de Educación Física:

QUE simbolizan os cinco aros da bandeira olímpica?

QUEN gañou a proba de salto de lonxitude nas Olimpíadas de México en 1968?

CANDO aparece por primeira vez aplicada a un deporte a palabra bádminton?

ONDE tivo lugar a olimpíada na que se celebrou por primeira vez unha competición de florete feminino por equipos?

CANTO era o capital da Sociedad El Gimnasio de Vigo en decembro de 1880?

COMO se chamaba o alcalde que presidiu as Olimpíadas de Verán do ano 1976?

As respostas deberán entregarse na caixa de xogos que hai na biblioteca no recreo do próximo luns.

Volve o club de lectura Auga da Laxe

2009-11-26T18:42:00.007+01:00

Estamos preparando a sesión trimestral do noso club de lectura, no seu cuarto curso de vida. Neste caso o libro escollido é Barro de Medellín, de Alfredo Gómez Cerdá, novela gañadora do premio Ala Delta e do Premio Nacional de Literatura Infantil e Xuvenil.

A sesión presencial será o luns 14 de decembro, de 15:00h a 17:00h. Todos os membros do club quedaremos a xantar xuntos no instituto e logo continuaremos coa sesión de conversa arredor desta lectura compartida. Mentres imos lendo, deixámosvos máis información sobre o libro e sobre os parques biblioteca de Medellín no noso club de lectura virtual.

NON Á VIOLENCIA DE XÉNERO

2009-11-25T11:29:00.003+01:00

Hoxe é o Día contra a violencia de xénero. Na biblioteca do IES Sánchez Cantón (Pontevedra)elaboraron este vídeo, que vos ofrecemos nós tamén desde aquí para axudar á necesaria reflexión sobre o tema da violencia contra as mulleres. No punto de lectura do noso instituto tedes tamén algún material para ver e ler estes días.

LEER.ES

2009-11-19T18:07:00.002+01:00

Acaba de presentarse Leer.es, un novo portal virtual dedicado á lectura e dirixido fundamentalmente á xente nova. Está promovido polo Ministerio de Cultura, en colaboración coas comunidades autónomas, a RAE e o Instituto Cervantes.
Segundo se di no propio portal, pretende transmitir o entusiasmo pola lectura e animar á súa práctica, así como ofrecer materiais e consellos para os docentes e as familias. Dispón, entre outras moitas cousas, dun blog no que se pode acceder ás conferencias e paneis do Congreso Leer.es, desenvolvido os días 13, 14 e 14 de novembro en Madrid.

Outubro: mes da biblioteca escolar

2009-10-10T01:00:00.008+02:00

Outubro é o mes escollido pola IASL (International Association of School Librarianship) para destacar o traballo que as bibliotecas escolares desenvolven ao longo de todo o curso co obxectivo de fomentar aS lecturaS e apoiar os procesos de aprendizaxe que se desenvolven nos centros de ensino. Outubro tróuxonos o comezo da hora de ler, trouxo a resolución do Plan de Mellora de Biblioteca Escolares 2009/10, traerá un programa de visitas do alumnado á biblioteca, traerá en Gondomar as xornadas Lendo en familia de Espazo Lectura e traerá tamén os días 23 e 24 en Compostela as Xornadas de Bibliotecas Escolares de Galicia 2009, nas que estaremos para aprender e mellorar así o noso traballo. Non todo en outubro vai ser a caída da folla...

RECANTO DA POESÍA

2009-10-04T19:31:00.003+02:00

Esta é a nosa proposta da semana para “O Recanto da poesía”.

VARIACIONES SOBRE UN VIEJO TÓPICO

Los violines de Verlaine.
Los soñados caminos de la tarde, de don Antonio.
Un viejo olor a campo.
Un viejo olor a lápices y a cuadernos.
El cielo gris.
El viento entre los árboles.
La caricia de las primeras lluvias.
La tristeza sin causa.
La soledad sonora.
La noche, cada vez más oscura y más larga.
Un cigarrillo que de pronto te sabe al primer cigarrillo.
Una antigua canción que te devuelve tus quince años.
Toda tu vida en imágenes, que acuden atropelladamente
como en una vieja película mal montada...

Ha llegado el otoño.

Javier Salvago, Volverlo a intentar, 1989

Comezou a hora de ler

2009-10-01T17:25:00.002+02:00

Comezou o curso e a biblioteca do instituto vai botando a andar tamén as súas actividades. Hoxe comezou a hora de ler, unha iniciativa que cada semana nos permitirá dedicar unha sesión do horario á lectura individual e silenciosa. Tamén manteremos a proposta de abrir a biblioteca tres tardes non lectivas (martes, mércores e xoves). Agora estamos incorporando o alumnado novo ao programa de xestión para que poida comezar a utilizar xa o servizo de préstamo dos fondos, nos que ocupa un lugar moi especial a obra de Agustín Fernández Paz. A nosa benvida neste novo curso.

Boas vacacións e boas lecturas!

2009-06-18T18:18:00.004+02:00

A biblioteca entregou xa os útlimos premios aos alumnos e alumnas que conseguiron máis bibliopuntos ao longo do curso (Sabela Vilar, Federico Villar, Enrique Crespo, Lucía Aguiar e María Pena) e está estes días facendo os últimos préstamos de lotes de libros para as vacacións. Marchamos, pero queremos facelo deixándovos unha recomendación de lectura dun libro que acaba de entrar na nosa biblioteca: Lúa do Senegal, de Agustín Fernández Paz, unha novela que nos achega á historia de Khoedi, un nena que ten que deixar a súa casa do Senegal para vir a instalarse en Vigo.

Deixámosvos tamén unha ligazón cunha páxina de xogos que preparou o noso alumnado de 1ºBach coa súa profesora de Tecnoloxía, Elena Fernández, a partir de diferentes libros de Agustín Fernández Paz. Agradecéndolles este fantástico traballo, desexámosvos unhas boas vacacións cheas de boas lecturas.

Premios e bibliopuntos

2009-05-27T17:40:00.003+02:00

Estanse a entregar estes días os premios dos últimos xogos organizados pola biblioteca. O cheque de 30 euros do enredo matemático que propuxemos dentro das actividades do Día das matemáticas foi para Tamara Misa, de 4ºESO-A. Os catro cheques de 25 euros da Olimpíada das Letras Galegas foron para o equipo formado por Lucía Aguiar (2ºESO-B), María Pena (2ºESO-A), Enrique Crespo (2ºESO-B) e Elena Crespo (2ºESO-A). Todos os participantes recibirán ademais bonos de zume para a cafetería do instituto e bibliopuntos. Estes foron os dous últimos xogos convocados pola biblioteca neste curso: nos próximos días publicaremos a listaxe final de bibliopuntos e saberemos quen son os cinco alumnos e alumnas que gañaron os premios especiais de fin de curso por seren os que máis bibliopuntos conseguiron.

Mario Benedetti, na memoria.

2009-05-19T00:46:00.005+02:00

Cinco haikus

+++

con estas lágrimas

se forman los arroyos

más transparentes

+++

¿dónde estaremos

cuando la dulce muerte

nos dé la mano?

+++

hace tres días

que no hay horizonte

¿se habrá acabado?

+++

en el exilio

siempre estamos colgados

de la nostalgia

+++

la nada es todo

de la nada salimos

y allí volvemos

+++

Mario Benedetti, Adioses y bienvenidas, 2006

Letras Galegas 2009

2009-05-15T11:25:00.006+02:00

Estamos ás portas do Día das Letras Galegas, dedicado este ano a Ramón Piñeiro. No patio central do instituto temos instalada unha exposición sobre a vida, a obra e a época que lle tocou vivir. Ao longo da próxima semana, todo o alumnado do centro visitará esta exposición e realizará durante a visita unha actividade co profesorado de Lingua galega.

Ademais, desde a biblioteca, propoñémosvos para a próxima semana unha Olimpíada da Letras Galegas, un xogo de busca de información no que poderán participar grupos de catro alumnos e alumnas. Cada grupo recibirá todos os días unha folla con preguntas relacionadas coa celebración do Día das Letras Galegas. O xogo rematará o venres cunha superpregunta que deberá resolverse durante o recreo na propia biblioteca. Cantas máis resposta correctas, máis puntos se poderán conseguir e máis posibilidades de acceder ao premio final: un cheque de 25 euros para cada un dos membros do equipo, que se poderá gastar en calquera das librarías de Gondomar.

Libros e Matemáticas

2009-05-11T10:42:00.029+02:00

Mañá celébrase o Día Escolar das Matemáticas. No IES Auga da Laxe elaboramos e repartimos entre todo o alumnado uns dípticos para a ESO e Bacharelato cunha selección de libros da biblioteca, da sección de Matemáticas. Tamén poderedes atopar unha interesante selección de libros sobre literatura e matemáticas en DivulgaMAT.

La biblioteca de Babel e El libro de arena, que figuran no díptico, constitúen fermosos exemplos de como J.L. Borges achega conceptos matemáticos ao mundo literario.

... ninguén soubo transmitir a fascinación pola xeometría, a perplexidade ante os paradoxos ou a vertixe ante o infinito coa precisión coa que el o fixo.

http://www.epsilones.com/

Tamén no Recanto da poesía temos esta semana un poema de Borges:

Junio, 1968

En la tarde de oro
o en una serenidad cuyo símbolo
podría ser la tarde de oro,
el hombre dispone los libros
en los anaqueles que aguardan
y siente el pergamino, el cuero, la tela
y el agrado que dan
la previsión de un hábito
y el establecimiento de un orden.
Stevenson y el otro escocés, Andrew Lang,
reanudarán aquí, de manera mágica,
la lenta discusión que interrumpieron
los mares y la muerte
y a Reyes no le desagradará ciertamente
la cercanía de Virgilio.
(Ordenar bibliotecas es ejercer,
de un modo silencioso y modesto,
el arte de la crítica.)
El hombre que está ciego,
sabe que ya no podrá descifrar
los hermosos volúmenes que maneja
y que no le ayudarán a escribir
el libro que lo justificará ante los otos,
pero la tarde que es acaso de oro
sonríe ante el curioso destino
y siente esa felicidad peculiar
de las viejas cosas queridas.

Jorge Luis Borges, Elogio de la sombra, 1969

Un día moi especial (2ª parte)

2009-04-23T09:23:00.005+02:00

Aquí vos deixamos unha morea de fotos dos actos celebrados o pasado día 31 de marzo, cando recibimos a visita de Agustín Fernández Paz para poñerlle o seu nome á nosa biblioteca. Inclúense imaxes do traballo feito previamente co alumnado, da exposición que se montou no patio central, do encontro que mantivo Agustín cos grupos de 4ºESO e, finalmente, do acto que celebramos á tarde con lectura dos seus textos, actuación do alumnado de música de 2º de bacharelato e descubrimento dun panel e unha placa co seu nome á entrada da biblioteca.

Día do Libro e Hora de ler

2009-04-22T17:12:00.005+02:00

Mañá xoves, 23 de abril, Día do libro, o IES Auga da Laxe poñerá a andar a Hora de ler. Cada semana todo o alumnado e o profesorado dedicará unha sesión de clase a lectura individual e silenciosa, todos ao mesmo tempo, na ESO e en Bacharelato. A actividade, aprobada por unanimidade no último claustro como proposta da Biblioteca, continuará até o remate do curso, cada semana na hora seguinte á da semana anterior. Esta será este ano a nosa maneira de celebrar o Día do libro lendo, cunha proposta que se suma ás que estes días están a propoñer as bibliotecas escolares galegas. Agardamos que esta iniciativa, que xa se está desenvolvendo con éxito noutros centros de ensino galegos, contribúa a mellorar a competencia lectora do noso alumnado e a consolidar espazos e tempos para a lectura.
Ademais, o Departamento de Lingua Española ofrécenos tamén estes días un folleto que nos permite achegarnos á figura e á obra de Juan Marsé, galardoado este ano co Premio Cervantes, que lle será entregado mañá en Madrid. Poderedes atopalo no Punto de lectura da planta baixa, onde tamén poderedes ler unha selección de textos de diferentes autores sobre a lectura, que substitúen esta semana o noso habitual recanto da poesía.

Un día moi especial

2009-04-03T00:22:00.006+02:00

Desde o pasado martes, 31 de marzo, a nosa biblioteca xa se chama Biblioteca Agustín Fernández Paz. Nunha xornada moi especial, na que contamos coa presenza do escritor, descubrimos un panel sobre a súa obra e unha placa co seu nome que queren deixar constancia da nosa pequena homenaxe. Houbo un encontro co alumnado, houbo lecturas, houbo música e, sobre todo, houbo moitas caras amigas, moito cariño e moita emoción. Ao noso redor, o recanto da poesía, unha exposición, as portadas dos seus libros, os comezos das súas novelas convidando a seguir lendo... Sobre as nosas cabezas, os rótulos cos nomes dos personaxes das súas obras, realizados polo alumnado de 3ºESO e 1ºBACH, vixiando as palabras coas que quixemos falar de recoñecemento, de gratitude e de cariño. Aquí deixamos algunhas fotos e prometemos, para despois das vacacións, unha crónica máis ampla. Grazas, Agustín, e grazas tamén a todos os que nos quixestes acompañar neste día tan especial.

Comezou o xogo do álbum de cromos

2009-03-25T17:16:00.004+01:00

Onte comezou o xogo do álbum de cromos. Na edición deste ano os cromos que debe conseguir o alumnado participante son 24 portadas de libros de Agustín Fernández Paz. Como xa ocorría o curso pasado, os sobres de cromos poden obterse participando nun xogo de preguntas que temos nos recreos na biblioteca e deixando recomendacións de lecturas na caixa de xogos da biblioteca ou no blog do club de lectura virtual. Os primeiros cromos e o álbum deste ano, que leva por título Os ríos de palabras de Agustín Fernández Paz, están xa nas mans dos 22 alumnos e alumnas que están participando e que seguirán xogando até o xoves da próxima semana. Que haxa sorte!

Que liches ti de Agustín Fernández Paz?

2009-03-19T23:59:00.006+01:00

Achégase o 31 de marzo, día no que imos recibir a Agustín Fernández Paz no instituto para descubrir a placa que fará efectiva a nosa decisión de poñerlle o seu nome á biblioteca. Mentres, convidamos o noso alumnado a que nos comente no taboleiro da biblioteca os libros seus que xa leron. Agora queremos tamén abrir aquí este espazo para convidar a todas as persoas que o desexen a recomendarnos ou comentar os libros que leron de Agustín. Así que xa sabedes cal é a pregunta: que liches ti de Agustín Fernández Paz?

4x4, lectores e lectoras todoterreo

2009-02-26T10:59:00.004+01:00

Botamos a andar unha nova proposta de dinamización dentro das actividades do club de lectura: 4x4, lectores e lectoras todoterreo. O alumnado ten ao seu dispor na biblioteca 20 lotes de catro exemplares do mesmo título co obxectivo de que formen grupos de catro persoas para levalos en préstamo, lelos e logo deixar comentarios e opinións no club de lectura virtual. Podedes contestarvos uns a outros e facer entre vós un pequeno club de lectura aberto que poida convidar a ler a outros compañeiros e compañeiras. Entre os 20 títulos seleccionados para esta iniciativa temos, por suposto, dous libros de Agustín Fernández Paz: Contos por palabras, para o 1º ciclo de ESO, e Cartas de inverno, para o 2º ciclo. Animádevos a compartir unha destas lecturas todoterreo.

A. MACHADO (Sevilla, 26/7/1875 - Collioure, 22/2/1939)

2009-02-19T13:53:00.008+01:00

Para conmemorar o 70 aniversario da morte de Antonio Machado, temos esta semana no “Recanto da Poesía” unha pequena mostra da súa obra. Nela poderedes atopar os versos máis tristes e melancólicos, pero tamén os máis críticos e comprometidos deste poeta.

Boas lecturas.

Allá, en las tierras altas,
por donde traza el Duero
su curva de ballesta
en torno a Soria, entre plomizos cerros
y manchas de raídos encinares,
mi corazón está vagando, en sueños...
¿No ves, Leonor, los álamos del río
con sus ramajes yertos?
Mira el Moncayo azul y blanco; dame
tu mano y paseemos.
Por estos campos de la tierra mía,
bordados de olivares polvorientos,
voy caminando solo,
triste, cansado, pensativo y viejo.

Antonio Machado, Campos de Castilla

LA MUERTE DEL NIÑO HERIDO

Otra vez es la noche... Es el martillo
de la fiebre en las sienes bien vendadas
del niño. Madre, ¡el pájaro amarillo!
¡Las mariposas negras y moradas!

Duerme, hijo mío. Y la manita oprime
la madre junto al lecho. ¡Oh flor de fuego!
¿Quién ha de helarte, flor de sangre, dime?
Hay en la pobre alcoba olor de espliego:

fuera la oronda luna que blanquea
cúpula y torre a la ciudad sombría.
Invisible avión moscardonea.

¿Duermes, oh dulce flor de sangre mía?
El cristal del balcón repiquetea.
¡Oh, fría, fría, fría, fría, fría!

Antonio Machado, Últimos poemas

Biblioteca Agustín Fernández Paz

2009-02-18T18:17:00.009+01:00

O Equipo de Biblioteca do IES Auga da Laxe acordou poñerlle á biblioteca do instituto o nome do escritor Agustín Fernández Paz. Ao longo deste 2º trimestre imos desenvolver unha serie de actividades que teñen como obxectivo divulgar esta nova entre toda a comunidade educativa, dar a coñecer a obra do escritor e convidar a participar no acto de colocación dunha placa co seu nome que se celebrará o día 31 de marzo de 2009 coa súa presenza.

Agustín Fernández Paz é un dos autores máis lidos entre o noso alumnado. Visitou o instituto en catro ocasións para participar en diferentes actividades, co alumnado e coas familias. Un dos seus relatos, “Un río de palabras”, inspirou unha campaña de dinamización desenvolvida desde o IES Auga da Laxe no ano 2005. Participou, ademais, nunha charla dirixida ás nais e pais na que lles falou da importancia da familia na creación e mantemento de hábitos lectores e na que naceu a idea de organizar no instituto un club de lectura. E foi tamén un libro seu –Noite de voraces sombras– o que protagonizou a primeira sesión do club de lectura do noso instituto no mes de marzo de 2006. Por todos estes motivos, e polo seu compromiso coa literatura e co fomento da lectura, é para nós unha honra que a nosa biblioteca leve o seu nome.

Acabamos de mercar aqueles títulos da súa obra que non estaban na biblioteca e estamos preparando algúns materiais que axudarán a achegar a súa produción literaria ao alumnado e ao profesorado do instituto. O día 25 de marzo, mércores, celebraremos a sesión trimestral do club de lectura, que xirará arredor da obra O único que queda é o amor, galardoada co Premio Nacional de Literatura Infantil e Xuvenil 2008. Na biblioteca temos exemplares desta e doutras obras do autor a disposición de todos aqueles que queirades aproveitar a ocasión da súa próxima visita para achegarvos aos seus libros.

Paz e poesía

2009-01-28T17:17:00.004+01:00

Estes días en que moitas bibliotecas escolares galegas traballan intensamente na preparación de actividades relacionadas coa poesía para contribuír á necesaria reflexión arredor do Día da Paz, o noso recanto fai tamén a súa contribución con este fermoso texto de Antonio García Teijeiro:

Choven balas
Seres berran
Arden vilas
Queiman leiras
Caen nenos
Chora a terra
Xeme o pobo
Pingas negras
Cicatrices
Dor vermella
Destrución
Chuvia cega
Berros tristes
Dor marela
Choven balas
e miseria
Noite fría
Tristes guerras
Nace o medo
Chora a terra.

Antonio García Teijeiro, Chove nos versos

Novo trimestre

2009-01-21T17:37:00.003+01:00

Comezamos o 2º trimestre, que nos ha traer novas propostas desde a biblioteca: 4x4, lecturas todoterreo ou Vexo, vexo, ti que les? son algunhas das ideas que irán aparecendo nas próximas semanas. Chegarán tamén as mochilas viaxeiras, o club de lectura e o álbum de cromos, unha iniciativa que tivo moi boa acollida o curso pasado. E falaremos moito de Agustín Fernández Paz.

Mentres todo iso vai botando a andar, deixámosvos cos poemas que nos acompañaron neste comezo do 2º trimestre desde o recanto da poesía:

SE NON SORRÍS COMIGO

Se non sorrís comigo, amor, non vivo.
Sen a túa beleza, ¿quen me eleva?
Sen a túa calor, ¿quen me dá brío?
Sen a túa alegría o mundo enteiro
é ancián engurrado, feo, irto.
Sen o hálito teu reina invernía.
Sen a túa palabra murcha o espírito.
Sen ti non chouta o corazón no peito.
Sen ti todo me sabe amargo, insípido;
todo é estrafalario, sen sentido,
sen luz, como un gran tunel escurísimo.
Sen a túa pel suave todo é toxo.
Sen o soar do riso da túa boca
os paxaros non dan cantos nin chirlos.
Sen as súbitas luces dos teus ollos
xa nin lúa nin sol ofrecen brillos.
Todo se volve fusco, mouro, bruto.
O próximo é un muro empedernido;
o mar, inmenso pranto sobre a praia.
Xa nada ten valor e xa non quero
erguerme na mañá. Xa todo é frío.
Se non te teño, amor, ¿para que vivo?

Bernardino Graña, Sen sombra e sen amor.

LA FUERZA DEL DESEO

Me preguntan por ti.
Yo no quisiera ni pronunciar tu nombre.

Sé demasiado bien
qué ocurre cuando llamas a las cosas:
que vienen.

Sé demasiado bien qué peligro se corre:
el de que vengan.

Inmaculada Mengíbar, Pantalones blancos de franela

Despedímonos!

2008-12-18T14:39:00.013+01:00

Hoxe rematou o xogo de busca do pista a pista e chegaron os primeiros bibliopuntos. Onte celebramos a sesión do club de lectura, con 17 persoas que falamos de poesía e lemos poemas. Moitos libros de poesía marcharon onte a pasar o nadal nas casas dos nosos usuarios. Tamén as nosas guías con recomendacións de lecturas voaron xa para as casas do noso alumnado e para as librarías de Gondomar. Só nos queda despedirnos desexándovos unhas boas vacacións e un feliz 2009. En xaneiro volveremos con máis lecturas e máis actividades.

Por se aínda non lles escribistes as cartas aos reis magos, aquí vos deixamos a ligazón co blog da asesoría de Bibliotecas Escolares, onde poderedes curiosear nas moitísimas guías de lecturas que elaboraron este ano as bibliotecas escolares galegas. É un auténtico luxo podermos contar con tantas referencias feitas desde a experiencia, a profesionalidade e o cariño.

150 GRAMOS DE POESÍA

2008-12-17T12:37:00.005+01:00

Hoxe, ás 18:00h, imos celebrar na biblioteca a sesión trimestral do club de lectura, dedicada nesta ocasión á poesía. Imos falar de poesía, recomendar libros de poemas, escoitar as recomendacións dos demais, ler en voz alta aqueles poemas que máis nos gustasen e compartir así eses 150 gramos de poesía que nos fixeron emocionarnos ou sorrir.

Nestas últimas semanas estivemos traballando coa poesía en diferentes grupos a través dunha cesta con libros de poemas preparada pola biblioteca. Tamén están expostos no instituto os traballos realizados polo alumnado de 1ºESO. Hoxe pecharemos esas actividades coa sesión de club de lectura, que está aberta ás familias. Tamén para as nais e pais do alumnado de 1º e 2º de ESO teremos ás 17:30h unha visita á biblioteca para presentarlles os fondos e servizos, moi especialmente os materiais da sección de nais e pais.

PISTA A PISTA

2008-12-10T12:06:00.005+01:00

Mañá comeza o Pista a pista, o primeiro xogo de busca deste curso. Desde o día 11 de decembro, xoves, propoñerémosvos cinco xogos de busca simultáneos que vos han levar a descubrir cinco datos. Cada día no recreo ofrecéremosvos no taboleiro da biblioteca unha pista para cada unha das cinco buscas. Teredes até o día seguinte ás 12,20h para deixar as vosas respostas nunha caixa que haberá na biblioteca. Ás 12,25 poñeremos unha nova pista que vos permitirá seguir buscando, no caso de que aínda non atopásedes a resposta. O xogo rematará o día 18. Ningún participante poderá dar máis de unha resposta por día. Ao final, faremos públicas as respostas correctas e a listaxe de bibliopuntos conseguidos polos diferentes participantes.

Podedes facer os cinco xogos de busca ou centrarvos nalgún. O número de bibliopuntos dependerá das pistas que precisedes para dar coa resposta correcta:

1ª pista: 5 bibliopuntos.
2ª pista: 4 bibliopuntos.
3ª pista: 3 bibliopuntos.
4ª pista: 2 bibliopuntos.
5ª pista: 1 bibliopunto.

Se deixades un comentario coa vosa opinión sobre o xogo aquí, no blog da biblioteca, poderedes conseguir, ademais, outro bibliopunto.

NON Á VIOLENCIA CONTRA AS MULLERES

2008-11-25T10:30:00.000+01:00

Hoxe celébrase o Día contra a violencia cara ás mulleres. No punto de lectura teremos toda a semana unha selección de recursos da biblioteca que nos axudarán a saber máis sobre este tema e, sobre todo, a sensibilizarnos da necesidade de estarmos alerta ante un problema social que se nos pode presentar baixo moitas caras, non sempre evidentes.

Con esa selección de recursos queremos sumarnos ao traballo que desde a materia de Educación Plástica fixeron estes días os nosos alumnos e alumnas coa súa profesora, Chus Ferrín, e ao traballo que a profesora Elena Fernández fixo co alumnado de TICs de 1º Bach, recollido no blog TICS para educar.

Como cada ano, son moitas as bibliotecas escolares galegas que ofrecen estes días os seus blogs como galería de imaxes e recursos que queren deixar oír a súa voz contra a violencia cara ás mulleres. Deixámosvos aquí as ligazóns a algunhas desas interesantes propostas:

Mesturas
Trafegando ronseis
O segrel do Penedo
Bibliobóveda
Biblioafonso
Biblioarzúa

RECANTO DA POESÍA

2008-11-23T19:57:00.004+01:00

LA VERDAD DE LA MENTIRA

Al lector se le llenaron de pronto los ojos de lágrimas,
y una voz cariñosa le susurró al oído:
-¿Por qué lloras, si todo
en ese libro es de mentira?
Y él respondió:
-Lo sé;
pero lo que yo siento es de verdad.

Ángel González, Nada grave

Os versos do último libro de Ángel González son tan fermosos que queremos que nos acompañen esta semana no “Recanto da poesía”.

LEO POEMAS

2008-11-20T21:53:00.005+01:00

LEO POEMAS

Leo poemas al azar,
leo casi sin pensar en lo que leo.
Cuando me encuentro un verso triste,
siento en el alma como una caricia.
No es que me alivie la tristeza ajena;
es que me siento menos solo.

Ángel González, Nada grave

Bagdad

A paz abafa
calada nas casas
da gran Bagdad.

Bagdad agarda
mañás calmas
bañadas na paz.

A paz calza alpargatas
balas calza
a arma fatal.

Bagdad arrastra
palabras mancadas
tras as armas vas.

A paz, palabra tan cara,
a paz,
palabra cabal.

Bagdad agarda
a paz da nácara,
prata, ámbar, ananás
...
A PAZ

Elvira Riveiro Tobío, Palabras brancas (2008)

Esta é unha pequena mostra das moitas novidades que están a entrar estes días na biblioteca.

O poema da semana

2008-11-12T18:59:00.004+01:00

Logo dun par de semanas co noso recanto da poesía dedicado aos versos que Agustín Fernández Paz toma prestados para ofrecérnolos nas páxinas de O único que queda é o amor, esta semana temos no expositor este poema de Luis Alberto de Cuenca.

DNA

DNA o ADN, poco importa
si en castellano o en inglés: el caso
es que me muero por tus proteínas,
por tus aminoácidos, por todo
lo que fuiste una vez, cuando tus padres
vinieron de cenar algo achispados
y, después de tirar de la cadena,
hicieron una nueva con tu nombre,
con tus curvas y con tus fantasías.
Dame una foto de tu DNA
tamaño DNI, que me retuerzo
de ganas de mirarla a todas horas.

Luis Alberto de Cuenca, Por fuertes y fronteras

Parabéns para Agustín Fernández Paz

2008-10-26T23:25:00.010+01:00

Desde a biblioteca do IES Auga da Laxe queremos sumarnos á chuvia de parabéns que estes días recibe Agustín Fernández Paz, quen acaba de ser distinguido co Premio Nacional de Literatura Infantil e Xuvenil-2008 polo seu libro O único que queda é o amor, unha obra que está ao voso dispor na nosa biblioteca e que recomendabamos no último boletín Líber do curso pasado.

Agustín Fernández Paz é un referente para as actividades da nosa biblioteca desde hai anos. Precisamente "Un río de palabras", un dos relatos que se inclúen no libro, deu lugar en maio de 2005, cando aínda estaba inédito, a un interesante traballo e a unha orixinal campaña de fomento da lectura polas rúas de Gondomar, desenvolvida polo alumnado de 4ºESO do noso instituto. Tamén Agustín Fernández Paz, nunha charla para as nais e pais do noso alumnado, puxo a semente da que nacería despois o noso club de lectura, que el mesmo inaugurou nunha sesión na que charlamos sobre o seu libro Noite de voces sombras. E tamén estivo presente Agustín na festa de fin de curso do ano pasado, nunha actividade promovida pola nosa biblioteca en colaboración cos departamentos de Lingua Galega e Educación Plástica: unha pequena peza de títeres representada polo alumnado de 1ºESO cun texto no que algúns dos protagonistas de diferentes obras de Agustín baixaron da biblioteca para conversar sobre os temas e os referentes que están presentes nos seus libros.

Pola amabilidade coa que sempre atende as nosas peticións, pola súa proximidade, acabou converténdose nun amigo da nosa biblioteca, o que fai que este premio nos alegre dun xeito especial. E para celebralo, esta semana o noso recanto da poesía acolle un fragmento do relato "Un radiante silencio", incluído en O único que queda é o amor. Deixámosvolo tamén aquí:

"Unha mañá, cando se dirixiu á sección de poesía, como sempre adoitaba facer despois de tomar o café, reparou en algo que lle chamou a atención. Alí, sobresaíndo encaixada entre dous libros, había unha pequena cartolina de cor azul que destacaba de xeito rechamante. Colleuna, intrigada. Era unha tarxeta alongada que tiña por unha das súas caras uns poucos versos escritos a man:

Tu cuerpo puede
llenar mi vida,
como puede tu risa
volar el muro opaco
de la tristeza.

Una sola palabra tuya quiebra
la ciega soledad en mil pedazos.

A lectura daqueles versos deixouna paralizada pola emoción, poucas veces se atopara cunha carga tan intensa nunhas poucas palabras, unha carga concentrada nelas como din que está a materia no núcleo dalgunhas estrelas. Releunos unha e outra vez, conmocionada, mentres miraba a un lado e a outro para comprobar se alguén se decatara do seu azoramento. Mais ninguén parecía reparar nela, nin na tarxeta que sostiña tremente entre as súas mans".

Agustín Fernández Paz, "Un radiante silencio", en O único que queda é o amor (2007)

Máis información sobre o Premio Nacional de Literatura Infantil e Xuvenil a Agustín Fernández Paz, no blog de Edicións Xerais.

Día da Biblioteca

2008-10-22T12:48:00.007+02:00

O 24 de outubro celébrase o Día Internacional da Biblioteca. No IES Auga da Laxe imos aproveitar esta data para organizar, como en anos anteriores, un programa de visitas á biblioteca do instituto para o alumnado novo (1ºESO e 1ºBACH). O obxectivo é informalos sobre os servizos, recursos e funcionamento da biblioteca e, no caso de 1ºESO, realizar ademais algún xogo de busca de información. Queremos así presentarlle a nosa biblioteca ao alumnado para que sexa para eles un referente, o servidor central que debuxa Manuel Lariño neste cartel da Asesoría de Bibliotecas Escolares da Consellería de Eduación, esa luz da que nos fala Agustín Fernández Paz no manifesto co que a Consellería de Cultura celebra esta data.

ONDE HAI UNHA BIBLIOTECA HAI UNHA LUZ
Agustín Fernández Paz

ABRE AS PORTAS e entra. Entra neste espazo que agarda por ti, neste ámbito onde cada palabra é un don que recibimos como agasallo. Percorre todos os recantos desta casa da liberdade, respira este aire que non sabe de fronteiras, déixate levar polo río de recendos que anuncia os tesouros da biblioteca.

Estamos nun lugar especial, sería imposible confundilo. Desde o ceo debe de verse como un punto de luz brillando coa intensidade maior, como un aleph que contén a memoria e os soños da humanidade. Unha luz, si. Unha luz que escintila coma un faro entre as tebras, co rítmico latexar dun corazón inmenso que expande ondas de liberdade e de esperanza polo territorio que a circunda.

Quizais poderiamos seguir vivindo se nos faltase este aire que fai vibrar todas as células do noso corpo, se cadra as persoas continuariamos coa nosa existencia rutineira se non existise a biblioteca, mais algún lugar decisivo ficaría baleiro no noso corazón.

Faltaríanos a enerxía que nos fai desexar unha vida mellor, unha cidadanía máis libre, unha sociedade máis xusta. Doeríanos non escoitar a voz das persoas que sufriron a historia e a das que a sofren agora mesmo; sería insoportable oír só as palabras dos que tentan dirixir e controlar as nosas vidas.

Para que isto non suceda, abre as portas e entra. Ábreas sempre, todas as portas, pois cada vez que o fas incorpóraste ao río subterráneo que alimenta a biblioteca, ao torrente de liberdade que a fai vivir e lle dá azos renovados.

ABRE OS LIBROS e mergúllate na auga da vida que abrolla irreprimible desde as súas páxinas. Déixate arrastrar pola fervenza de voces, de linguas, de recendos, de paisaxes. Non esquezas nunca o abraio que experimentamos nos anos da infancia, cando se nos revela a dimensión máxica que teñen as palabras e descubrimos que as páxinas dos libros poden conter o mundo enteiro.
Como as labregas que se afanan na rebusca de espigas entre os regos despois da ceifa, tamén os escritores recollen as palabras unha a unha e elaboran con elas o humilde pan dos seus textos. Deste xeito fan que cheguen ata nós, sempre novas e sempre sorprendentes, pois os libros posúen a insólita capacidade de revivir e reinventarse en cada nova lectura.

Todas as persoas necesitamos as historias, os soños, as palabras, talvez sexa unha característica inscrita no ADN da humanidade. Necesitámolas coma o comer, como beber auga, xaora que si. Para entendermos o mundo e para entendernos a nós mesmos, para soñar outros destinos, para loar os dons que a vida nos dá. Sabemos que non poderiamos vivir sen o alento da imaxinación e da creatividade, sen as palabras que expresan a variedade e a beleza dos nosos desexos e dos nosos sentimentos.

Por todo iso, abramos os libros. Eles conteñen os soños, as paixóns, os medos, os amores, as risas. Nas súas paxinas habita a inmensa variedade de sentimentos e experiencias da humanidade, das persoas que viven agora en calquera lugar do mundo e das que desapareceron hai moitos anos. Os libros: ríos de palabras que se nos ofrecen con xenerosidade para axudarnos a aprender o oficio de vivir, para cambiarnos a vida e implicármonos na transformación do mundo.

ONDE HAI UNHA BIBLIOTECA HAI UNHA LUZ que traspasa todos os muros, unha luz que se fai máis intensa cando medran as persoas que a incorporan ás súas vidas. As mesmas persoas que logo, ao saíren por rúas e prazas, levarán canda elas o reflexo desa luz, a semente dese mundo novo que algún día faremos agromar. Un mundo máis solidario, máis plural, máis culto, máis xusto. Un mundo onde non se escoite a voz adormecedora dos poderosos, senón as palabras múltiples e diversas de todas as persoas que habitamos esta casa común que é o noso planeta.

II Encontros de Bibliotecas Escolares

2008-10-17T00:29:00.006+02:00

Os días 17 e 18 de outubro celébranse en Compostela os II Encontros de Bibliotecas Escolares de Galicia, organizados pola Asesoría de Bibliotecas Escolares da Consellería de Educación. Baixo o lema Bibliotecas para ler e aprender, os encontros ofrecen un atractivo programa no que se inclúen tanto conferencias de especialistas como paneis de experiencias, fundamentalmente de bibliotecas escolares galegas integradas no PLAMBE. A nosa biblioteca estará presente o sábado 18 á mañá a través dun relatorio no que explicaremos o traballo desenvolvido o curso pasado na materia Proxecto Interdisciplinar de 1ºESO.

Ramiro Fonte, na memoria

2008-10-13T10:45:00.001+02:00

Esta fin de semana faleceu en Barcelona o poeta e narrador galego Ramiro Fonte, director do Instituto Cervantes en Lisboa. No punto de lectura teremos estes días algunha información sobre a súa obra, así como os exemplares dos seus libros que temos na biblioteca. Tamén o noso recanto da poesía lembrará esta semana os seus versos.

Non vos preocupedes da miña soidade
que acepto e que merezo sen dúbida ningunha
ou da melancolía atenta, resignada
coa que ás veces procuro rematar os poemas,
como facendo o aceno
daquel que sabe a tempo retirarse.

No blog bretemas podedes atopar máis información e ligazóns.

Por fin abrimos a biblioteca

2008-10-08T18:25:00.007+02:00

Esta semana abrimos a biblioteca, cun considerable atraso e un certo pouso desencantado. Foi un comezo difícil. Como consecuencia dos recortes de profesorado e da redución de horas de atención á biblioteca, o Equipo de Biblioteca decidiu, nunha reunión celebrada o 18 de setembro, suspender todo o labor de dinamización por non poder atendelo e centrar as poucas horas que tiñamos en labores de catalogación e préstamo. Esta semana, logo de que nos enviasen unha nova profesora e se refixesen os horarios, abrimos cunha dedicación horaria digna, a que o traballo da biblioteca precisa, en beneficio de todos. Deste xeito poderemos seguir desenvolvendo o labor de dinamización que xa realizabamos en anos anteriores e abriremos a biblioteca tres tardes fóra do horario lectivo: os martes, mércores e xoves, de 17:00h a 19:00h.

Conseguimos finalmente as horas que precisabamos, pero perdemos polo camiño moitas enerxías e acabamos coa sensación de que, a pesar do esforzo por formarnos e por desenvolver actividades de dinamización máis alá dos nosos horarios, cada comezo de curso temos que enfrontarnos á incertidume de non saber se imos dispoñer dun mínimo de horas para continuar co noso traballo. Desde as bibliotecas escolares galegas, sobre todo desde a posta en marcha do Plan de Mellora de Bibliotecas Escolares, estamos a desenvolver un traballo intenso e innovador que se converteu xa nun referente no resto do estado. Aínda así, na maioría dos casos as horas de biblioteca non son consideradas como lectivas, non hai unha dotación horaria mínima establecida e segue sen existir un recoñecemento oficial da figura do responsable da biblioteca escolar.

A pesar do desgaste que supuxo a tensión deste comezo de curso, retomamos o traballo coa ilusión e as ganas de sempre, conscientes da importancia que nos centros de ensino teñen as bibliotecas escolares e sabedores de que, como din algúns compañeiros doutras bibliotecas, estamos nunha carreira de fondo que pouco a pouco está a dar froitos. Aínda así, non podemos evitar traer aquí a pregunta que máis se repite nos foros e nas actividades de formación relacionadas co ámbito das bibliotecas escolares: para cando o recoñecemento oficial do noso traballo e das horas que se precisan para desenvolvelo?

Até o próximo curso

2008-06-26T13:08:00.009+02:00

Rematou o curso 2007/08 e, xunto co boletín de notas, o noso alumnado levou o número 37 do boletín informativo da biblioteca Líber, con información das últimas actividades e algunhas recomendacións de lecturas para o verán.

A biblioteca chegou case aos 1.600 préstamos (a cifra máis alta destes últimos anos) e acolleu moitas actividades de dinamización e de formación de usuarios. Destaca neste sentido o feito de que se impartise nela a nova materia Proxecto Interdisciplinar de 1ºESO, que lles permitiu aos alumnos e alumnas ter un maior coñecemento da biblioteca e realizar alí varios proxectos de investigación, que eles mesmos valoraron moi positivamente tanto nas enquisas de avaliación como no blog que abrimos para esta materia.

Outra das novidades deste curso foron os bibliopuntos que conseguiron os ususarios da biblioteca ao participaren nas actividades: xogos de busca, club de lectura, recomendacións de libros, blog, etc. Finalmente foron 45 os alumnos e alumnas que obtiveron bibliopuntos, unha listaxe encabezada por Sabela Vilar de 1ºESO-A (38 bibliopuntos), Enrique Crespo de 1ºESO-C (36 bibliopuntos), Ángela García de 2ºBACH-A (28 bibliopuntos), Erea Fabeiro de 2ºBACH-A (26 bibliopuntos) e Camila Álvarez de 1ºESO-C (24 bibliopuntos). Estes cinco alumnos gañaron cadanseu cheque de 30 euros para gastar nunha das librarías de Gondomar.

Os nosos parabéns para eles e tamén para os compañeiros e compañeiras que máis libros levaron da biblioteca: Inés de Jesús (1ºESO-C), Carlos Muñoz (1ºBACH-A), Teresa Méndez (4ºESO-A), Antonio G. Rodríguez (1ºESO-B) e Tomás Palamidessi (2ºBACH-B).

Aquí vos deixamos as nosas recomendacións de lectura para as vacacións do verán. Até o próximo curso.

● Agustín Fernández Paz, O único que queda é o amor, Xerais.

Nos relatos deste libro os personaxes namóranse e descobren que o amor é un sentimento poderosísimo, capaz de transformalos por enteiro. E nesa experiencia os libros son compañeiros fundamentais.

● Carlos Ruiz Zafón, El juego del ángel, Planeta.

El juego del ángel é a segunda entrega dun ciclo de catro novelas interconectadas e ambientadas na Barcelona misteriosa e gótica que vai dende a era da revolución industrial até os anos posteriores á guerra civil española.

● Agustín Agra, Cazaría salvaxe, Xerais. Novela de terror e misterio.
● María Reimóndez, Lía e as zapatillas de deporte, Xerais.
● J.K.Rowling, Harry Potter e as reliquias da morte, Galaxia. Sétima e última entrega desta saga de maxia e aventuras.
● Iolanda Zúñiga, Vidas post-it, Xerais.
● Ángel González, Antología de poesía para jóvenes, Alfaguara.
● Ignacio Martínez de Pisón, Dientes de leche, Seix Barral.
● Eduardo Mendoza, El asombroso viaje de Pomponio Flato, Seix Barral.
● Linzi Glass, El final de la inocencia, Siruela.

Gañadores do xogo do álbum de cromos

2008-06-04T18:11:00.008+02:00

Finalmente foron 18 os alumnos e alumnas que conseguiron completar o álbum de cromos dentro do prazo establecido. Realizado o sorteo, os gañadores dos dous cheques de 50 euros para gastar nalgunha libraría de Gondomar foron Sabela Vilar (1ºESO-A) e Pablo Durán (1ºESO-C). Os nosos parabéns!!

Repartíronse en total 437 sobre de cromos, con 3 cromos cada un, o que supón un total de máis de 1.300 cromos en circulación. Os catro alumnos que máis cromos conseguiron foron Enrique Crespo con 38 sobres, Sabela Vilar con 30, Federico Villar con 27 e Camila Álvarez tamén con 27. Os nosos parabéns tamén para estes compañeiros que, levasen o cheque ou non, foron os que máis preguntas responderon nos recreos e os que máis recomendacións de lecturas deixaron tanto na biblioteca como no blog.

Todo o alumnado participante recibiu unha mochiliña cun caderno de viaxe no que poderán ir recollendo as súas lecturas de verán. Agardamos que algunhas desas lecturas cheguen tamén aquí, ao noso blog, en forma de recomendacións, para non perdermos ese hábito adquirido durante o xogo de compartir libros cos demais. Así todos saímos gañando.

Aquí vos deixamos algunhas imaxes dos últimos momentos do xogo e do esperado sorteo de cheques na biblioteca. Grazas a todos e a todas vós por participar con tanto entusiasmo!!

Os últimos cromos

2008-05-26T10:06:00.009+02:00

Hoxe entregamos os últimos sobres do xogo do álbum de cromos da biblioteca. Foron dúas semanas de intensa actividade para todos os alumnos e alumnas que participaron: responderon 291 preguntas na biblioteca nos recreos, deixaron 82 recomendacións de lecturas na caixa da biblioteca e case 200 no noso blog. Sabemos que xa hai dous álbums completos, con todas as portadas de libros, pero quedan aínda un par de días para que intercambio de cromos que tan ben funcionou nestas dúas semanas dea os seus últimos froitos. O mércores no recreo remata o prazo para entregar o álbum e poder entrar no sorteo dos dous cheques de 50 euros para gastar nalgunha das librarías de Gondomar.

Deixámosvos aquí algunhas fotos e convidámosvos a que nos contedes o que vos pareceu o xogo para facermos avaliación entre todos desta actividade que revolucionou a biblioteca durante dúas semanas.

O álbum de cromos da biblioteca

2008-05-12T01:56:00.003+02:00

Hoxe comeza o xogo do álbum de cromos da biblioteca, dirixido ao alumnado de 1º e 2º da ESO. Temos anotados 53 alumnos e alumnas que a partir de hoxe comezarán a xuntar e a intercambiar os cromos -portadas de libros- que poderán pegar no álbum que lles demos seguindo as pistas que nel figuran. Hai tres xeitos de conseguir os sobres de cromos:

1. Participando nun xogo de preguntas que teremos todos os recreos na biblioteca.

2. Deixando unha recomendación dalgún libro no club de lectura virtual, ao que podedes acceder picando na ligazón que atoparedes no panel lateral deste blog.

3. Deixando unha recomendación de lectura na caixa que hai na biblioteca. No taboleiro atoparedes unhas fichas para facelo. Esas recomendacións poñerémolas logo no novo panel que hai á entrada da biblioteca.

Agardamos que este novo xogo sexa divertido e que vos permita coñecer mellor a biblioteca e compartir con todos as vosas lecturas favoritas.

Ven á semana fantástica... da biblioteca!

2008-05-08T11:43:00.019+02:00

Logo de que a biblioteca recuperase o seu aspecto habitual e desaparecesen as obras e cables que nos inundaron este último mes, convidámosvos a achegarvos á nosa semana fantástica. Tanto no punto de lectura como na propia biblioteca tedes destacadas esta semana as novidades de literatura fantástica que fomos incorporando. Inclúense, entre outros, os tres títulos da triloxía de Fairy Oak, que algúns dos nosos alumnos e alumnas nos pediron.

JUAN GELMAN. SEGUNDA ENTREGA

2008-04-23T20:25:00.003+02:00

“Pero hay recuerdos que no necesitan ser llamados y siempre están ahí y muestran su rostro sin descanso. Es el rostro de los seres amados que las dictaduras militares desaparecieron. Pesan en el interior de cada familiar, de cada amigo, de cada compañero de trabajo, alimentan preguntas incesantes: ¿cómo murieron? ¿Quiénes lo mataron? ¿Por qué? ¿Dónde están sus restos para recuperarlos y darles un lugar de homenaje y de memoria? ¿Dónde está la verdad, su verdad? La nuestra es la verdad del sufrimiento. La de los asesinos, la cobardía del silencio. Así prolongan la impunidad de sus crímenes y la convierten en impunidad dos veces.
[...]
Hay quienes vilipendian este esfuerzo de memoria. Dicen que no hay que remover el pasado, que no hay que tener ojos en la nuca, que hay que mirar hacia adelante y no encarnizarse en reabrir viejas heridas. Están perfectamente equivocados. Las heridas aún no están cerradas. Laten en el subsuelo de la sociedad como un cáncer sin sosiego. Su único tratamiento es la verdad. Y luego, la justicia. Sólo así es posible el olvido verdadero. La memoria es memoria si es presente y así como Don Quijote limpiaba sus armas, hay que limpiar el pasado para que entre en su pasado. Y sospecho que no pocos de quienes preconizan la destitución del pasado en general, en realidad quieren la destitución de su pasado en particular.”

Fragmento do discurso de Juan Gelman ao recibir o premio Cervantes.

JUAN GELMAN

2008-04-21T20:25:00.006+02:00

O 23 de abril, Día do Libro, o poeta arxentino Juan Gelman (Buenos Aires, 1930) recollerá en Alcalá de Henares o premio Cervantes.

Nos seus primeiros libros aparecen xa os temas que van ser constantes na súa obra: o amor, a política e a vida cotiá. Durante a ditadura militar arxentina (1976-1983) foi perseguido e tivo que exiliarse. O seu fillo e a súa nora, embarazada de 8 meses, foron detidos e “desaparecidos”. A obra desta época reflicte a dor pola perda do fillo e de moitos amigos e compañeiros. É unha poesía que quere loitar contra o esquecemento.

“¿Qué hicieron de vos / hijo / dulce calor que alguna vez niñaba al mundo / padre de mi ternura / hijo que no acabó de vivir?”

Desde hai case 20 anos reside en México e vén de publicar Mundar, o seu último poemario.

Nunha entrevista, publicada por El País o 26 de xaneiro de 2008, Gelman di:
“El pasado forma parte de nosotros. [...] El mío ha sido un pasado muy marcado por ciertas tragedias, el exilio, la desaparición de mi hijo... que dejan una huella muy fuerte. Me interesa saber qué pasó. Indagarlo, no como nostalgia, sino como pregunta. No es una actitud pasiva, creo yo. Intento no quedarme en el pasado. Estoy viviendo hoy. Tal vez por eso haya en mis poemas tantas preguntas.”

Foto de Ale Palamidessi

Hai poemas de Gelman agardando por ti no Recanto da Poesía.

Dous premios e un poema

2008-04-16T11:46:00.004+02:00

Parabéns para o IES de Sanxenxo que acaba de recibir o premio Irmandade do Libro á mellor campaña de fomento da lectura nun centro educativo, no que recibiron tamén dous accésit o CEIP Emilia pardo Bazán e o IES Álvaro Cunqueiro, de Vigo. No blog do IES de Sanxenxo podedes botarlle unha ollada ás súas actividades, entre elas as bases da IV edición do seu certame literario.

Parabéns tamén para Ángela García e Jénnifer Simoes, alumnas nosas de 2º de bacharelato, que gañaron os dous exemplares de La Tierra herida que sorteabamos entre o alumnado participante no xogo de preguntas sobre cambio climático que convocamos como complemento ao noso club de lectura. Esta tarde, ás 18:00h, teremos na biblioteca a sesión presencial na que, ademais de falar do libro de Miguel Delibes e Miguel Delibes de Castro, poderemos ver un pequeno documental sobre o cambio climático.

Deixámosvos por último o noso bocadiño de poesía desta semana:

ULISES

Os reis dos gregos convocáronme

a aventuras remotas. Sombras imprecisas

finxían ós meus ollos armas

de sonoroso bronce,

catálogos de naves,

gloriosos estandartes,

cabalos de madeira, incendios,

horrendos cíclopes, sereas

de portentoso canto,

praias ignotas e nausícaas.

Mais eu fíxenme o tolo.

Despedín con presentes

os pomposos arautos,

e non abandonei

a casa de Laertes,

nin durmín unha noite

fóra do leito de Penélope.

Darío Xohán Cabana, Cabalgada na brétema

O RECANTO DA POESÍA

2008-04-06T19:26:00.003+02:00

LATITUD

No quiero más que estar sobre tu cuerpo
como lagarto al sol los días de tristeza.

Se disuelve en el aire el llanto roto,
el pie de las estatuas
recupera la hiedra
y tu mano me busca
por la piel de tu vientre
donde duermo extendido.

José Ángel Valente, Mandorla, 1982

Este texto do poeta ourensán José Ángel Valente agarda por vós no Recanto da Poesía.

Unha despedida e unha benvida

2008-04-02T00:39:00.006+02:00

Acabamos de despedir a exposición do Día Mundial da Poesía Elas, poetas, que nos acompañou estes últimos días no punto de lectura. Tanto o expositor como os libros están de volta na biblioteca, igualmente ao voso dispor.

E, ao tempo que despedimos o expositor das poetas, dámoslle a benvida a un novo punto de referencia dos materiais da biblioteca: temos na sala de profesores un novo expositor no que imos ir ofrecendo unha selección de materiais de especial interese para o profesorado, nun esforzo por achegar os nosos materiais cada vez máis aos destinatarios.

ELAS, POETAS

2008-03-12T10:08:00.007+01:00

Olga Novo

Achégase o 21 de marzo, Día Mundial da Poesía, e o recanto da poesía da biblioteca do IES Auga da Laxe, que nos agasalla desde hai tres anos cun poema quentiño cada semana, disponse a recibir esta data coa palabra poética das mulleres máis novas. Elas, as poetas que enchen as follas máis recentes da edición de poesía en galego e en castelán, agardan por vós no punto de lectura, onde poderedes atopar os seus libros xunto cunha selección de poemas para ler ou para levar e saborear logo en soidade. Lupe Gómez, Olga Novo, Paula Carballeira, Yolanda Castaño, Estíbaliz Espinosa, María do Cebreiro, Xiana Arias, Mónica Góñez, Ana Romaní, Luísa Castro,Vanesa Pérez-Sauquillo, Almudena Guzmán, Ada Salas, Inmaculada Mengíbar, Ariadna G. García, Carmen_Jodra e Elena Medel son as poetas que poderedes ler durante un par de semanas no punto de lectura. Logo regresarán aos andeis da biblioteca, onde poderedes atopalas con facilidade xa que os libros de poesía teñen agora un círculo vermello no lombo.

Que teñades boas vacacións, boas lecturas e un feliz Día da Poesía!

Muller e poesía

2008-03-03T11:52:00.008+01:00

Esta semana o recanto da poesía do instituto acolle un par de poemas do libro As horas de María, de Paco Souto. É a nosa pequena homenaxe a tantas marías que moven a nosa sociedade, xusto ás portas do Día da Muller Traballadora.

ENCALDADA

Anacos de pan duro
Verzas e millas
Mondas de pataca
Auga quente de maio
Auga fría de sete outonos
E tres gotas non máis de auga bendita

No pote de ferro
María cociñando o vento

***

De nena
Chamar as vacas do verán

Ei morena ve!
Careta ao rego!

Traballo simple
De atinar
Cuestión de ritmo

O tío Manuel
Cravando fondo o arado milenario
Nas veas da terra
Atrás
A xente
E María dos mil anos
Apañando as patacas
De entre o sangue

Paco Souto, As horas de María, 2007

E, na voz de Paco Souto, aquí vos deixamos tamén esta carta de María a Manuel.

O RECANTO DA POESÍA

2008-02-25T16:08:00.004+01:00

Él me da todo
lo que necesito.

Cobijo y abrigo
en las noches
de frío
y sombra y frescor
en los días
de calor.

De él como,
de él bebo
y por él respiro.

Y cuando extiende
sus ramas
y su aroma de cedro
me abraza
las mariposas saben
que tienen
que dejarnos solos.

Almudena Guzmán, El príncipe rojo, 2005

Esta é a nosa invitación á poesía para a semana. Pertence ao último libro de Almudena Guzmán co que gañou o V Premio Internacional de Poesía “Claudio Rodríguez”.
Na biblioteca do IES poderás atopar USTED, un dos seus poemarios máis coñecidos.

Boas lecturas!

Xa temos gañadores

2008-02-01T02:09:00.000+01:00

Xa sabemos quen son os alumnos que gañaron os catro exemplares das novelas que sorteabamos no xogo de preguntas desta semana:

Cristina Alonso Fernández (2º BACH-B)
Camila Álvarez Pereira (1ºESO-C)
Carlos A. Muñoz Argibay (1ºBACH-A)
Inês Pereira Casaca de Jesús (1ºESO-C)

Ademais, todos os que participastes tedes dous novos bibliopuntos que se suman na vosa conta. Á volta das vacacións de entroido poderedes consultar no taboleiro da biblioteca a listaxe actualizada de bibliopuntos.

Palabras para a paz

2008-01-30T11:54:00.000+01:00

Con motivo da celebración do Día da Paz, temos esta semana no punto de lectura unha exposición de libros da biblioteca relacionados con este tema. Tamén o xogo de preguntas que tedes no taboleiro da biblioteca ten que ver con diferentes galardoados co premio Nóbel da paz: até o xoves no recreo podedes participar e, ademais de gañar dous bibliopuntos, entraredes no sorteo de 4 exemplares dos libros propostos para o club de lectura do próximo 13 de febreiro.

Como mostra destas palabras para a paz que vos ofrecemos desde a biblioteca, deixámosvos aquí o poema de Xosé Mª Álvarez Blázquez que esta semana podedes atopar no noso recanto da poesía:

Non é certo que os nenos teñan fame.
Non pode ser.
Ben o sabedes todos
os que andades no mundo atafegados
á percura do pan dos vosos fillos.
Ises outros que vedes pola rúa
pedindo esmola,
non teñen fame, non, porque daquela
vos teríades morto de vergonza.
E ben vos vexo andar nos vosos
coches ou nos tranvías, a berrar de cousas
estranas: -¡viva, beba, baba, buba!-
sen reparar naquil esfarrapado
que coa moura mauciña está petando
na porta de ferro.
Por iso penso que non é verdade
o que algún caviloso di dos nenos
que andan así petando pola vida.
-¡Non, home, non!- lle dixen a un
de aqueles.
-A xente pasa leda... ¡Fora boa
que andivesen a rirse dos seus crimes!

Xosé María Álvarez Blázquez (1915-1985)

Recomendámosvos visitar os outros blogs das bibliotecas escolares galegas onde poderedes atopar diferentes textos e materiais audiovisuais que sen dúbida contribuirán á necesaria reflexión arredor deste tema.

Nova sesión do club de lectura

2008-01-18T09:43:00.000+01:00

Acabamos de convocar unha nova sesión do club de lectura. Será o 13 de febreiro de 2008, ás 18:00h, na biblioteca. Nesta ocasión propoñemos catro libros de ficción científica de Ramón Caride Ogando, que estará connosco o día 13: Perigo vexetal, Ameaza na Antártida, O futuro roubado e A negrura do mar. Tedes máis información na sección de biblioteca do noso sitio web.

Na próxima semana a biblioteca convocará un xogo de preguntas que vos permitirá entrar no sorteo de catro exemplares das obras propostas e conseguir os primeiros bibliopuntos do 2008. Tamén podedes ir deixando xa os vosos comentarios no club de lectura virtual.

Os bibliopuntos do 1º trimestre

2007-12-20T22:45:00.001+01:00

Logo das propostas de xogos e concursos que fomos facendo ao longo do 1º trimestre, aquí vos deixamos a cabeceira da clasificación provisional que deixou a suma de bibliopuntos até agora. A listaxe completa tédela no taboleiro da biblioteca. Logo das vacacións do Nadal haberá novas propostas para seguir sumando...

Erea Fabeiro Rey (2ºBACH-A): 11 bibliopuntos
Sabela Vilar Estévez (1ºESO-A): 11 bibliopuntos
Ángela García Abalde (2ºBACH-A): 7 bibliopuntos
Jénnifer Simoes Carvajal (2ºBACH-B): 6 bibliopuntos
Cristina Alonso Fernández (2ºBACH-B): 5 bibliopuntos
Teresa Méndez Martínez (4ºESO-A): 4 bibliopuntos
Carlos Muñoz Argibay (1ºBACH-A): 4 bibliopuntos
Marta Pereira Conde (1ºESO-B): 4 bibliopuntos
Stefanie Nicole Audifred Costas (2ºBACH-A): 3 bibliopuntos
Natán Palma de Castro (2ºESO-C): 3 bibliopuntos
Eva Parada Antón (3ºESO-A): 3 bibliopuntos

Día Internacional dos Dereitos Humanos

2007-12-10T12:39:00.000+01:00

Hoxe é o Día Internacional dos Dereitos Humanos. Desde a semana pasada temos no instituto dúas exposicións de traballos do alumnado que nos convidan a reflexionar sobre o significado desta data e a cantidade de persoas que viven no mundo en situacións nas que non se garanten os principios establecidos na Declaración Universal dos Dereitos Humanos. Con ese mesmo obxectivo de ofrecer información e favorecer a reflexión crítica, a vicedirección programou para esta semana unha serie de actividades que podedes consultar no sitio web do instituto.

Desde a biblioteca, ademais da convocatoria do club de lectura, quixemos contribuír a esa reflexión co poema do noso recanto da poesía:

Non vexo o ceo
nin vexo o mar.
Sinto que a néboa
está a medrar.
Vexo fusís.
Oio disparos.
Vexo uns rapaces.
Nenos soldados.
Vexo os seus ollos.
Son de metal.
Dor nas facianas.
Anxos do mal.
Nenos da fame.
Nenos raptados.
Nenos sen lazos.
Nenos forzados.
Seres feridos.
Nenos roubados.
Vítimas frías.
Nenos soldados.
Que alguén te salve,
neno da guerra!
Eu teño tanto...
Ti tes miseria!

Antonio García Teijeiro, Petando nas portas de Dylan

Convidámosvos tamén a botarlle unha ollada aos materiais elaborados de xeito conxunto por algunhas das bibliotecas escolares galegas, aos que podedes acceder desde os seus blogs.

Nova sesión do club de lectura

2007-11-28T23:09:00.000+01:00

O Club de Lectura Auga da Laxe acaba de convocar a súa primeira sesión deste curso. Será o 19 de decembro, ás 18:00h, na nosa biblioteca. O libro proposto é Cartas de amor, de Fran Alonso, un conxunto de relatos con forma de cartas que nos permiten coñecer as situacións vitais difíciles que lles tocou vivir ás mulleres que os protagonizan. Esta actividade da biblioteca intégrase dentro do programa de actos que a vicedirección do instituto preparou con motivo do Día Internacional dos Dereitos Humanos.

Convidámosvos a ler o libro e a asistir á sesión de tertulia do día 19, na que contaremos coa presenza do autor, e tamén a que nos deixedes os vosos comentarios no club de lectura virtual, ao que podedes acceder desde a portada que atoparedes na marxe dereita do blog.

Anxo Fariña na nosa biblioteca

2007-11-19T23:32:00.000+01:00

Anxo Fariña visitou hoxe a nosa biblioteca para manter un encontro co alumnado de 1ºESO, que desde hai un mes traballa co seu libro Os megatoxos e o aprendiz de druída. Contounos moitas cousas da súa obra como ilustrador e como autor, dos seus personaxes -moi especialmente dos Pelelliños e dos Megatoxos-, das súas teimas ao debuxar. Explicounos como naceron os Megatoxos, converteu a Enrique nun futuro personaxe da serie, asinou libros e carteis e deixouse fotografar coas máscaras dos Megatoxos que fixeron os nosos alumnos e alumnas nas clases de Eduación Plástica coa súa profesora, Liliana. Grazas, Anxo, pola túa visita e pola túa simpatía.

O alumnado de PIN visita o blog

2007-11-07T18:22:00.000+01:00

Este curso temos en 1ºESO unha materia nova: Proxecto Interdisciplinar (PIN). Ten como obxectivo fundamental o adestramento do alumnado na busca de información e na elaboración de proxectos de investigación de carácter interdisciplinar nos que demostren a súa competencia para comprender, elaborar e presentar esa información. No noso instituto esta materia impártese na biblioteca e, logo de varias semanas aprendendo a coñecer mellor os recursos que ofrece e a súa organización, imos comezar agora o adestramento na busca de información na rede. Estes días, o alumnado de PIN está a visitar o blog da biblioteca. Benvidos!

Os Megatoxos andan pola biblioteca....

2007-11-04T01:30:00.000+01:00

Desde que chegaron á biblioteca hai xa tres semanas, os Megatoxos non paran de moverse. Van de man en man e de casa en casa achegándolles aos nosos alumnos de 1ºESO as súas aventuras na procura dun toxo mutante, un camiño que os levará a enfrontarse ao terrible e poderoso Drunxel. Esta pasada semana Ruxe, Faísca, Ninfa e Lúa foron protagonistas tamén dun xogo de busca de información na biblioteca que resolveron con grande habilidade os alumnos de 1ºESO na materia Proxecto Interdisciplinar. A próxima semana, un xogo aberto a todo o alumnado levará tres exemplares de Os megatoxos e o aprendiz de druída ás mans dalgúns dos que se animen a participar. Pero o día grande dos Megatoxos na nosa biblioteca será o luns, 19 de novembro, cando Anxo Fariña, autor da novela e creador dos personaxes, nos visite para contarnos como naceron os Megatoxos. Ven á biblioteca a buscar o teu exemplar de Os Megatoxos e o aprendiz de druída e déixanos logo a túa opinión do libro no noso club de lectura virtual.

OS PRIMEIROS BIBLIOPUNTOS

2007-10-30T23:26:00.000+01:00

Como xa vos anunciamos, a biblioteca vai ir convocando ao longo do curso xogos e concursos nos que poderá participar todo o alumnado do instituto. Eses xogos vanvos permitir gañar bibliopuntos que poderedes ir acumulando e que, ao remate do curso, poderedes cambiar por agasallos.

Os resultados do concurso de tradución que convocamos a comezos de outubro tráennos os primeiros bibliopuntos:

Erea Fabeiro Rey (2ºBACH-A): 5 bibliopuntos
Sabela Vilar Estévez (1ºESO-A): 5 bibliopuntos
Teresa Méndez Martínez (4ºESO-A): 4 bibliopuntos
Marta Pereira Conde (1ºESO-B): 4 bibliopuntos
Stefanie Nicole Audifred Costas (2ºBACH-A): 3 bibliopuntos
Natán Palma de Castro (2ºESO-C): 3 bibliopuntos
Ángela García Abalde (2ºBACH-A): 1 bibliopunto
Jénnifer Simoes Carvajal (2ºBACH-B): 1 bibliopunto
Carlos Muñoz Argibay (1ºBACH-A): 1 bibliopunto

Moitos parabéns para estes compañeiros e compañeiras e, xa sabedes, a seguir xogando. Os seguintes bibliopuntos virán da man dos Megatoxos...

Día Internacional das Bibliotecas

2007-10-23T23:06:00.000+02:00

Con motivo da celebración do Día Internacional das Bibliotecas Escolares, o Equipo de Biblioteca do IES Auga da Laxe preparou para esta semana do 22 ao 26 de outubro un calendario de visitas de todo o alumnado do centro á biblioteca para coñecer as instalacións, recentemente renovadas, e recibir información sobre a organización dos fondos e as actividades e o funcionamento dos distintos servizos que se ofrecen. O calendario completo de visitas podedes velo no sitio web do instituto.

Os poemas da quincena

2007-10-19T00:50:00.001+02:00

Este ano, ademais do poema que semanalmente nos acompaña no recanto da poesía do instituto, imos ter nas aulas de Lingua Galega e de Lingua Española os poemas da quincena, unha nova fiestra que abrimos para poñer a poesía nas vosas mans. En breve entrará na biblioteca unha selección de novidades de poesía. Mentres, aquí vos deixamos os primeiros poemas da quincena deste curso:

LECCIÓN DE GRAMÁTICA

Yo estoy, tú estás y ella
está y él también;
y todos los que estaban estuvieron
y están muy bien.

Estamos, estaremos
nosotros; ella y él
estarán lado a lado, y yo, que estuve,
estaré.

Y si acaso estuviera
alguien que no haya estado aquella vez,
¡bienvenido!, que estar es lo importante
y que todos estén.

David Fernández Chericián

A VOLTA DOS NOVE

Nove vidas
Nove mortes
Unha volta
Cos seus nomes.

Nove nomes
Gravados na memoria
A memoria dun pobo,
Baiona.

Unha vila,
Nove homes,
Unha xustiza,
A morte.

Nove vidas perdidas
Nove almas en pena
Unha vila en guerra.

Unha guerra pola paz,
Unha guerra pola xustiza
Un lema
Que non se repita!

Sabela Vilar, 2006.
1º ESO-A. IES Auga da Laxe

DESPEGAMOS DE NOVO

2007-10-01T01:10:00.000+02:00

A biblioteca do IES Auga da Laxe abre as súas portas hoxe, día 1 de outubro, para iniciar unha nova viaxe neste curso 2007/08. E despegamos esta vez con moitas novidades: mobiliario novo, equipos informáticos novos, pintura nova nas paredes, sistema novo de premios e, en breve, un novo programa de xestión dos fondos. Tamén, por suposto, novas ideas e novas propostas para conseguirmos unha biblioteca cada vez máis viva e máis aberta a toda a comunidade educativa.

Comezamos cunha serie de propostas arredor da celebración do Día Internacional da Tradución, que nos acompañarán até o 11 de outubro: no punto de lectura teremos unha selección de libros e de textos traducidos, dous poemas traducidos do portugués e do catalán no recanto da poesía e a convocatoria dun concurso de tradución co que o noso alumnado poderá conseguir os primeiros bibliopuntos do curso. Máis información, na sección de biblioteca do sitio web do instituto.

Benvidos ao novo curso e boa viaxe!

DESPEDÍMONOS CUN PREMIO... E CON POESÍA!

2007-06-25T13:04:00.000+02:00

Remataron os xogos de busca da biblioteca nestes últimos días de curso e, con eles, as actividades que preparamos no 3º trimestre arredor do mundo dos libros e as viaxes. Hai moitas cousas que mellorar para o próximo ano, pero queda a satisfacción do traballo realizado e os comentarios positivos do alumnado. Tamén nos queda o sabor doce da concesión dun premio da Consellería de Cultura polo programa de actividades que desenvolvemos nos meses de abril e maio: son 1.000 euros que han axudar a seguir mellorando os fondos da biblioteca.

E, por suposto, coma sempre, queda a poesía, esa compañeira que nos saudou semanalmente desde o seu recanto no punto de lectura do instituto. Con poesía e viaxes nos despedimos até o próximo curso: boas vacacións e felices lecturas!

CONTATRÁS

10...

Abrochade os pantalóns

se non,

que escándalo!

9...

agarrádevos aos asentos

se non,

que medo!

8...

despegade

voade

7...

deixade saír os ollos

que miren ben lonxe

6...

deixade que o nariz se mova

que sinta os arrecendos

que cheire

5...

deixade que a boca se abra

que se abraie

ieeeepaie

4...

despedídevos dos demais

dos que quedan cos pés na terra

dos que non saben que hai paxaros no aire

3...

despedídevos do que queda atrás

do que non voa

por máis que vos doa

2...

esquecede por un intre

que sodes persoas

1...

xoguemos a ser xigantes

así o mundo non será tan grande

0...

O

Mund

O

Paula Carballeira, Contatrás, Ed. Positivas, 2006

ÚLTIMAS VIAXES DO CURSO

2007-06-21T13:43:00.000+02:00

Esta mañá estivo o alumnado de 2ºESO viaxando cos libros na biblioteca. Dentro do programa de actividades que o instituto organizou para os dous últimos días de clase a biblioteca encargouse de preparar un xogo de pistas e un xogo de busca de información con 36 preguntas nas que, partindo dalgunha novela, propoñíanse viaxes a diferentes países para buscar datos que nos levaban polos mapas, as enciclopedias, os atlas e todos os materiais que ofrece a biblioteca. Mañá tócalles aos de 1ºESO.

BOA VIAXE!

2007-06-11T23:42:00.000+02:00

Esta semana temos no patio central do instituto unha exposición de libros da biblioteca sobre viaxes, reais e fantásticas, a diferentes lugares do mundo ou da imaxinación. Convidamos o noso alumnado a viaxar con eses libros a través do xogo de busca "Etapa a etapa" que lles propón catro viaxes (azul, verde, amarela e vermella). Todos os días –desde o luns até o xoves– irémos formulando no tabolerio que está a carón da exposición unha pregunta para cada viaxe. Para completar os catro itinerarios deben atopar as respostas correctas ás catro preguntas que constitúen as distintas etapas e escribilas nas fichas de participación que están alí ao seu dispor. Poden escoller unha das catro viaxes ou tentar facer as catro. As respostas a todas as preguntas atópanse nos libros que están na exposición.

Entre os rapaces que opten por realizar unha das catro viaxes sortearemos un cheque de 20 euros para gastar nalgunha librería de Gondomar. Ademais, haberá un premio especial: entre todos os que decidan realizar as catro viaxes respondendo correctamente as 16 preguntas do xogo sortearemos un cheque de 50 euros para gastar tamén nalgunha librería da vila.

As preguntas de cada etapa poñeranse cada día entre o luns e o xoves ás 12:00h. Teñen de prazo para depositar as fichas de participación coas respostas na caixa que hai ao lado da exposición até o venres, 15 de xuño, ás 12:30h.

PAULA CARBALLEIRA NA NOSA BIBLIOTECA

2007-05-27T23:57:00.000+02:00

O pasado venres estivo na nosa biblioteca Paula Carballeira para acompañarnos na sesión de club de lectura que tiñamos sobre a súa novela Smara. Presentou María Fernández Italiani, alumna de 2º Bach, quen nos leu ademais un fermoso texto de Paula Carballeira sobre as mulleres que contan historias, publicado na revista Animal. Logo emocionámonos con Lalia, a curtametraxe de Silvia Munt, que nos axudou a situarnos no espazo en que se suceden as historias de Smara. Despois Paula falounos da novela, falounos do pobo saharauí e das historias que aprendeu nos campamentos de refuxiados de Tinduf, contounos anécdotas, respondeu as nosas preguntas e agasallounos cun conto final. Foi unha delicia compartir hora e media cunha Paula Carballeira próxima e distendida, tenra e desenfadada, que nos fixo rir e sentir moi de preto a atmosfera cálida de Smara. Moitas grazas a Paula e a todas e todos os que nos acompañastes na última sesión do noso club de lectura por este curso. Verémonos de novo o próximo ano.

NOVA SESIÓN DO CLUB DE LECTURA ESTE PRÓXIMO VENRES

2007-05-22T01:02:00.000+02:00

A biblioteca do IES Auga da Laxe vai celebrar o próximo venres, 25 de maio, ás 18:00h, unha sesión do seu club de lectura sobre a novela Smara, de Paula Carballeira, protagonizada por un neno que viaxa ao campamento de refuxiados saharauís de Smara, onde escoitará da avoa Ugago historias marabillosas que falan do deserto e das lendas e tradicións do seu pobo, os fillos da nube. A sesión, que contará coa presenza da autora, comezará co visionado da curtametraxe Lalia, de Silvia Munt, que fai un achegamento ao conflito saharauí a través dos ollos dunha nena.

O Club de lectura Auga da Laxe, que naceu o ano pasado e leva xa cinco convocatorias, ten como obxectivo favorecer a lectura reflexiva e a conversa arredor das obras propostas. Convidámosvos a achegarvos o venres ao instituto para participar nesta sesión ou a deixar a vosa opinión sobre a novela no club de lectura virtual do blog da biblioteca.

MARÍA MARIÑO VISITA A NOSA BIBLIOTECA

2007-05-15T00:59:00.000+02:00

A biblioteca do instituto vaise converter os días 15 e 16 de maio no salón da casa de María Mariño para acoller cinco representacións do monólogo María Mariño, en primeira persoa, protagonizado por Rocío Rodríguez Salgueiro, quen se transformará na poeta á que este ano se lle dedica o Día das Letras Galegas. O monólogo, que fai un percorrido polos feitos máis destacados da vida e da obra de María Mariño, irá acompañado da lectura de varios poemas da autora. As representacións terán lugar na biblioteca co seguinte horario:

Martes, 15

11,10h-12,00h: 1º BACH-A e 1º BACH-B
12,30h-13,20h: 4º ESO-A, 4º ESO-B e 1º ESO-A
13,20h-14,10h: 2º ESO-A e 2º ESO-B

Mércores, 16

12,30h-13:20h: 1ºESO-B e 1ºESO-C
13:20h-14:10h: 3º ESO-A e 3º ESO-B

ABRIL E MAIO, LETRAS PARA TODO O ANO

2007-05-12T10:19:00.000+02:00

Estes días pódense atopar nalgúns establecementos comerciais de Gondomar os materiais da campaña Abril e maio, letras para todo o ano, promovida pola biblioteca do IES Auga da Laxe. Son uns expositores cunhas tarxetas dirixidas a todos os veciños e veciñas nas que os convidamos a ler un poema, ao tempo que reflexionamos sobre a importancia de que, máis alá do Día do Libro ou do Día das Letras Galegas, o hábito da lectura nos acompañe ao longo de todo o ano.

Os poemas que se ofrecen como un convite nas tarxetas pertencen a Olga Novo, Daniel Salgado, Antonio García Teijeiro, Lupe Gómez e María Mariño, autora á que se lle dedica este ano o Día das Letras Galegas. O texto que acompaña os poemas é o seguinte: "Nestes meses a primavera chega tamén á literatura. Arredor do Día do Libro e do Día das Letras Galegas chégannos numerosas propostas de lecturas e novidades editoriais, un agromar de letras que desde a Biblioteca do IES Auga da Laxe esperamos que dure todo o ano, para que calquera día sexa bo para achegarse a un libro. Por iso vos convidamos a ler unha selección de poemas cos que queremos desexarvos feliz primavera e boas lecturas."

SEMANA DO LIBRO

2007-04-27T00:27:00.000+02:00

Remata a semana do libro e con ela a primeira das actividades que preparamos desde a biblioteca para convidarvos a viaxar lendo. Cada día levamos un libro da biblioteca até o panel do punto de lectura para ofrecervos un fragmento que servise de "aperitivo". O luns foi Smara, de Paula Carballeira. O martes, No soy un libro de José María Merino; o mércores, A expedición do Pacífico de Marilar Aleixandre; o xoves, Cidades de Fran Alonso; e hoxe, venres, O portal dos elfos de Herbie Brennan. Nas próximas semanas a estas cinco propostas sumaranse moitas máis lecturas que sairán da biblioteca para formar parte dunha exposición que estará no patio central do instituto para lembrarche que, se queres viaxar cos libros, non tes máis que vir á biblioteca.

E mentres imos preparando esa exposición e a campaña "Abril e maio, letras para todo o ano", da que vos falaremos nos próximos días, deixámosvos co comezo de Smara de Paula Carballeira, a novela protagonista da sesión do noso club de lectura deste terceiro trimestre, que terá lugar o 25 de maio ás 18:00h coa presenza da autora:

"Din que o meu pai era un bo reporteiro. Eu só sei que esperaba que volvese das súas viaxes para que me contase as historias dos lugares que coñecera. Pero ao meu pai non lle gustaban os contos, prefería falarme das paisaxes, das xentes, do grande que era o mundo.

Ao cumprir once anos, pedinlle que me levase con el nalgunha viaxe. O meu pai sorriu, aloumiñoume a cabeza e quedou coa mirada fixa no horizonte, como elixindo nun mapa invisible o lugar ao que me levaría. Supoño que despois de barallar as cartas do destino decidiu que o acompañase ao gran deserto, ao Sáhara".

ABRIL, MES DOS LIBROS. MAIO, MES DAS LETRAS.

2007-04-23T00:04:00.000+02:00

O terceiro trimestre tráenos dúas celebracións importantes no calendario da lectura: o 23 de abril, Día do Libro, e o 17 de maio, Día das Letras Galegas. E aínda que nós cremos que hai que ler e animar a ler todo o ano, tampouco está de máis aproveitar estas datas para celebrar e facer da lectura unha festa. Por iso, enlazando abril e maio, a biblioteca vai desenvolver unha serie de actividades arredor dun mesmo lema: Para viaxar cos libros, ven á biblioteca. Aínda que vos iremos dando conta desas iniciativas pouco a pouco desde aquí, se queredes botarlle unha ollada á programación completa, tédela ao voso dispor na sección de biblioteca da web do instituto.

E agora deixámosvos cuns versos de Gamoneda que esta semana estarán no recanto da poesía do noso punto de lectura. Porque hoxe, 23 de abril, Día Internacional do Libro, Antonio Gamoneda (Oviedo, 1931) recibirá o premio Cervantes 2006 en recoñecemento á totalidade da súa obra. Este poeta asturiano considera que “la poesía no es exactamente literatura de ficción, sino que es una emanación de naturaleza existencial y expresa el sufrimiento y el gozo”. Se queredes coñecer máis sobre este escritor, aí van algunhas ligazóns e unha mostra da súa poesía.

http://amediavoz.com/gamoneda.htm
http://www.epdlp.com/escritor.php?id=2596

Hablan los manantiales en la noche,

hablan en los imanes del silencio.

Siento la suavidad de las palabras olvidadas.

***

Amé todas las pérdidas.

Aún retumba el ruiseñor en el jardín invisible.

Libro del frío, 1992

LER NAS AULAS

2007-04-19T13:02:00.000+02:00

Esta semana comezou a funcionar nas tres aulas de 1ºESO o programa de dinamización "Ler nas aulas". Desde a biblioteca preparamos tres caixas con 50 libros cada unha: en galego, en castelán, en inglés, novelas, relatos, poesía, cómic,... Unha selección variada que poñemos ao dipsor do alumnado e do profesorado para facer lectura individual nas aulas, dentro do horario lectivo. Cada caixa inclúe tamén unha folla de seguimento na que o profesorado que participe no programa poderá ir anotando os espazos que dedique á lectura dentro das súas clases e facendo as suxestións e propostas de mellora que estime oportunas. Hai tamén unhas fichas de lectura nas que os alumnos poderán ir recollendo as súas valoracións sobre os libros que vaian lendo e a súa opinión sobre esta iniciativa.

Xa vos iremos contando os resultados desta experiencia que pretende crear novos espazos e tempos para a lectura e que comeza a andar neste terceiro trimestre no que se concentran dúas datas importantes do calendario da lectura, o 23 de abril e o 17 de maio. Porque aínda que leamos e animemos a ler todo o ano, tamén está ben celebrarmos de cando en vez esa paixón lectora dun xeito especial... E para iso estamos a "cociñar" numerosas propostas para degustar no abril dos libros e o maio das letras.

CAIXAS DE LIBROS, CADERNOS DE VIAXE E VACACIÓNS!

2007-03-31T10:24:00.000+02:00

Estivemos estes últimos días sacando libros dos andeis da biblioteca para encher tres caixas que van viaxar despois da semana santa ás aulas de 1ºESO para botar a andar o programa "Ler nas aulas".

E tamén cos alumnos de 1ºESO marcharon esta semana uns cadernos de viaxe nos que se comprometeron a plasmar reflexións, debuxos, poemas, fragmentos, comentarios, etc. das súas lecturas. Son unha parte dos materiais da campaña "Hora de ler", da asesoría de bibliotecas escolares da Consellería de Educación, coa que nos convidan a ler o mundo e deixar que os libros nos leven de viaxe.

Pero de todas estas cousas falarémosvos polo miúdo ao comezo do terceiro trimestre. Agora, despois de deixarmos falar o corpo, marchamos de vacacións!!!!

DÍA MUNDIAL DA POESÍA 2007

2007-03-21T01:35:00.000+01:00

Hoxe celébrase o Día da Poesía. E aínda que non o pareza, hoxe tamén chega oficialmente a primavera. Nós quixemos que nas paredes do noso instituto agromase esta semana dun xeito especial a poesía, polo que vos deixamos nelas unha selección de 16 poemas dos que podedes recoller unha copia no expositor que está no punto de lectura, moi preto dese noso recanto da poesía que, ao longo de todo o curso, vos acompaña cun poema semanal.

A selección de poemas que preparamos inclúe textos publicados nos últimos quince anos, para achegarvos a poesía máis nova. Quixemos poñela tamén ao voso dispor na nosa web, pero un corte inoportuno no servizo impedíunolo. Agardamos que xa a poidamos ter aí a semana que vén. Mentres, aquí vos deixamos unha brevísima mostra para desexarvos un poetizante Día da Poesía:

Esta será na morte
a miña última palabra:
quen me dera ser gata
para vivirte sete veces.

Olga Novo (Vilarmao, Lugo, 1975), Nós nus, 1997

DE VOLTA AO ASTEROIDE B-612

2007-03-12T15:01:00.000+01:00

Logo de pasar unha tempada no noso instituto, o principiño voltou hoxe ao asteroide B-612. Mentres estivo aquí, ademais de ler a súa historia, o noso alumnado de 1º ESO tivo a oportunidade de participar en diferentes actividades:

- Unha charla-coloquio coa profesora Concha Costas sobre as diferentes edicións e interpretacións da obra.

- A montaxe teatral "O principiño viaxa polo espazo", coa compañía Tranghallada Teatro.

- Unha lectura dun fragmento de O principiño en galego (Marta, Andrea e Gonzalo, de 1ºESO) , castelán (Alex, Almudena e Juan, de 1ºESO), portugués (Joao Paulo, de 2ºESO), catalán (Tamara, de 3ºESO), italiano (Pedro, de 2º Bach), francés (Agustín, de 1ºESO, e Katya, de 2ºESO), Inglés (Sara, Miguel, Agustín, Natán, Sheila e Sandra, de 1ºESO) e alemán (Ángel, de 2º Bach). Grazas a todos eles pola súa participación e aos profesores de Lingua Galega (Benxamín), de Lingua Española (David), de Inglés (Carolina) e de Francés (Santas) pola súa colaboración na preparación desta lectura.

Ademais destas actividades especialmente dirixidas ao alumnado de 1ºESO, todos tivemos a oportunidade de ver no patio central do instituto unha exposición que incluía case 70 edicións de O principiño en 35 linguas distintas, así como traballos que o alumnado de 1ºESO realizou nas últimas semanas nas clases de Educación Plástica a partir das ilustracións de A. de Saint-Exupéry que aparecen no libro. O noso agradecemento tamén para os profesores que realizaron este traballo cos alumnos (Dorinda e Manuel Ulloa).

Deixámosvos aquí algunhas imaxes desa exposición, ao tempo que lle desexamos ao principiño un feliz regreso ao asteroide B-612.

VIAXANDO CON... O PRINCIPIÑO

2007-03-01T19:35:00.000+01:00

Podemos viaxar de moitos xeitos distintos: en tren, en barco, en globo, en soños... E tamén podemos viaxar cos libros. Durante este 2º trimestre o alumnado de 1º ESO estivo lendo O principiño, de Antoine de Saint Exupéry, o libro máis traducido da literatura francesa. Con el viaxaron por diferentes planetas, coñeceron personaxes moi peculiares e visitaron o mundo dos sentimentos. Como complemento desa lectura, desenvolvemos desde a biblioteca unha serie de propostas: un xogo de busca, uns paneis cunha selección de fragmentos e unha charla-coloquio sobre o libro. Na próxima semana pecharemos este traballo de dinamización cun programa de actividades no que haberá teatro, unha lectura plurilingüe e unha exposición de exemplares do libro traducido a 40 linguas diferentes e de traballos realizados polo alumnado de 1º ESO. No 3º trimestre a biblioteca seguirá convidándovos a viaxar cos libros, a ler o mundo.

Se picas na portada de O principiño que está aquí ao lado poderás acceder ao noso club de lectura virtual e deixarnos a túa opinión ou comentario sobre este libro.

DE VIAXE-4

2007-03-01T16:03:00.001+01:00

Podes viaxar en soños.

DE VIAXE-3

2007-02-28T12:45:00.000+01:00

Podes viaxar en globo.